Vindur vaxandi af austri og hlýnar

Atli Ísleifsson skrifar 12. janúar 2021 07:16

Hiti verður á bilinu eitt til sex stig við suðvesturströndina í kvöld. Vísir/Vilhelm

Eftir nokkra bjarta og kalda daga um landið sunnanvert fer vindur nú vaxandi af austri og suðaustri og þykknar upp. Vindur verður á bilinu þrettán til tuttugu suðvestantil í kvöld þar sem hvassast verður syðst.

Sömuleiðis hlýnar og hiti ætti að vera kominn vel yfir frostmark á sunnan- og vestanverðu landinu í nótt og komin rigning eða slydda allvíða. Hiti eitt til sex stig við suðvesturströndina en annars hægara, bjartviðri og frost núll til fimm stig.

Þetta kemur fram á vef Veðurstofunnar. Áfram verði hægur vindur, bjart veður og kalt á Norðaustur- og Austurlandi.

Svipað veður á morgun og ættu hlýindin að ná lengra austur á Norðurlandi.

Spákortið fyrir klukkan 13 í dag, eins og það leit út í morgun.Veðurstofan

Veðurhorfur á landinu næstu daga

Á miðvikudag: Suðaustan 10-18 m/s, en hvassari á stöku stað. Rigning eða slydda, en þurrt að kalla NA-lands. Hiti 0 til 6 stig, svalast NA-lands.

Á fimmtudag: Suðlæg átt, 8-15 m/s, rigning eða slydda með köflum og hiti 1 til 5 stig, en hægari, bjartviðri og hiti um frostmark NA- og A-lands.

Á föstudag: Austlæg eða breytileg átt og rigning eða slydda á stöku stað um landið sunnanvert, en þurrt fyrir norðan. Heldur svalara veður.

Á laugardag og sunnudag: Breytilegar áttir, stöku él og kólnandi veður.

Á mánudag: Útlit fyrir hæga norðlæga átt með éljum fyrir norðan, en annars víða þurrt. Frost um mest allt land.

Veður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.