Google-bíllinn í startholunum

Google tilkynnti í dag að til standi að aka um götur Íslands með það fyrir augum að bæta gæði Íslandskorta á Google Maps kortavefnum og safna myndum til notkunar í Street View þjónustunni vinsælu.

Vísir hefur þegar greint frá þessu verkefni en á morgun munu bílar á vegum Google hefja aksturinn og taka 360 gráðu víðmyndir (e. panorama) af borgum, bæjum og þorpum og vegunum þar á milli. Þær verða nýttar á komandi mánuðum, fyrir Íslendinga, ferðamenn og netverja sem vilja kanna mögulega áfangastaði og kynnast landinu betur.

Street View er vinsæl þjónusta á netinu sem nær nú þegar til 50 landa víðsvegar um heiminn: Notendur geta skoðað heiminn af furðu mikilli nákvæmni í gegnum tölvur sínar og jafnvel þrætt sig í gegnum borgarhverfi með hjálp víðmynda af götum. Í tilkynningu kemur fram að þessi þjónusta sé einnig í boði sem hluti af Google Earth og Google Maps for Mobile.

Aksturinn hefst í Reykjavík og nágrenni en svo verður haldið út á land og bæir og þorp mynduð með sama hætti. Gert er ráð fyrir að mynda eins mikið af vegakerfinu og hægt er næstu tvo mánuðina. Akstursáætlun ræðst þó af utanaðkomandi þáttum svo sem veðri og/eða lokunum vega.

Hér er hægt að sjá hvar bílar Google eru staddir þá stundina.