Mörg umferðaróhöpp vegna hálku

Mörg umferðaróhöpp tengd hálku urðu í umdæmi lögreglunnar á Suðurnesjum um helgina. Lögreglunni barst í gær tilkynning um bíl sem sat fastur þversum á Reykjanesbrautinni, en lögreglumenn komu ökumanninum til aðstoðar.

Á kafla Reykjanesbrautarinnar þar sem bíllinn snerist var flughált og fuku þar margir bílar af veginum þegar sterkar vindhviður gengu þar yfir. Einnig lentu tveir bílar utanvegar við afleggjara að Innri-Njarðvík. Þá var ekið á umferðarskilti við Rósaselstorg og loks varð árekstur á gatnamótum við Heiðarberg/Garðskagaveg.

Engin teljandi slys urðu á fólki en talsvert tjón varð á bílunum. Kranabíll var notaður til að fjarlægja bílana.