Vilja sáttanefnd í læknadeiluna

Formenn stjórnarandstöðunnar sendu í gær frá sér sameiginlega yfirlýsingu þar sem þeir kalla eftir sáttanefnd vegna læknadeilunnar.

Í yfirlýsingunni segir meðal annars að ríkisstjórnin virðist ráðalaus í deilunni.

„Brúa verður það bil sem er á milli afstöðu lækna og ríkisins. Landsmenn eiga heimtingu á því að stjórnvöld geri allt sem mögulegt er að til að greiða fyrir lausn deilunnar.“

Formennirnir vísa í lög um stéttarfélög og vinnudeilur þar sem segir að ríkisstjórnin geti, ef sýnt þyki að vinnudeila hafi mjög alvarlegar afleiðingar, skipað sérstaka sáttanefnd til að vinna að lausn deilunnar.

„Við formenn Samfylkingar, Vinstri grænna, Bjartrar framtíðar og Pírata hvetjum ríkisstjórnina til að hugleiða beitingu þessa úrræðis og ræða við ríkissáttasemjara um hvort þessi leið geti auðveldað það verkefni að brúa bil milli aðila. Það er ekki hægt að sitja með hendur í skauti við þessar aðstæður,“ segir að lokum í yfirlýsingunni.