Læknar hafna hugmyndum um sáttanefnd

Formaður samninganefndar Læknafélags Íslands hafnar hugmyndum forystumanna stjórnarandstöðunnar um að skipa sérstaka sáttanefnd í deilunni. Hugmyndir þessa efnis hafa einnig verið ræddar í ríkisstjórn og heilbrigðisráðherra segir slíkt koma til greina ef deilan leysist ekki á næstu vikum.

Í sameiginlegri yfirlýsingu sem forystumenn stjórnarandstöðunnar sendu frá sér í gær er lagt til að ríkisstjórnin skipi sérstaka sáttanefnd til að vinna að lausn læknadeilunnar en viðræður hafa hingað til ekki skilað neinum árangri. Sáttanefndin yrði skipuð í samráði við deiluaðila og gert að koma með tillögur til lausnar deilunni.

„Við leggjum þetta til af því deilan er komin í harðan hnút. Við sjáum að afleiðingarnar geta orðið mjög alvarlegar. Bæði fyrir heilbrigðisþjónustuna og þar með fyrir allan almenning í landinu. Það er heimildarákvæði í lögum um að ríkisstjórnin geti skipað sáttanefnd í vinnudeilum sem eru komnar í mjög harðan hnút og hafa svona víðtæk áhrif. Þannig að þetta er auðvitað inngrip en við höfum áhyggjur af því að það gangi hvorki né reki, " segir Katrín Jakobsdóttir formaður VG.

Sigurveig Pétursdóttir, formaður samninganefndar Læknafélags Íslands hafnar hins vegar þessari hugmynd.

„Ég sé ekki alveg að sáttanefnd geti komið með þá tölulegu hækkun sem að þarf til að læknar samþykki hana," segir Sigurveig.

Kristján Þór Júlíusson, heilbrigðisráðherra, segir að þessi leið hafi verið rædd í ríkisstjórn og við deiluaðila í síðustu viku en hann telur þó rétt að gefa samninganefndum frekari tíma til að ná sátt.

„Í mínum huga er algjörlega ljóst að það verður að leggja töluvert á sig til að forða því að það verkfall sem boðað er í  upphafi næsta árs skelli á. Það er ástand sem ég tel ekki forsvaranlegt að gangi yfir Íslendinga,“ segir Kristján Þór.

Hversu mikinn tíma fá deiluaðilar?



„Eigum við ekki að sjá hvernig miðar í þessari viku,“ segir Kristján Þór.