Fínn sigur hjá KR í Færeyjum

KR er í fínum málum í Evrópudeildinni eftir 1-3 sigur á ÍF Fuglafjörður í Færeyjum í kvöld. Það þarf því mikið til að KR komist ekki áfram í næstu umferð.

KR-ingar lentu í vandræðum þegar Dánjal Á Lakjuni kom heimamönnum yfir eftir tæplega tíu mínútna leik.

Topplið Pepsi-deildarinnar rankaði fljótlega við sér og Kjartan Henry Finnbogason jafnaði leikinn á 22. mínútu eftir góðan undirbúning frá Magnúsi Má Lúðvíkssyni.

Átta mínútum síðar komust KR-ingar yfir þegar Guðmundur Reynir Gunnarsson skoraði. Mark hjá honum í tveimur leikjum í röð.

Staðan í hálfleik var 2-1 fyrir KR. Gestirnir úr Vesturbænum réðu ferðinni í seinni hálfleik en gekk illa að koma boltanum í netið.

Rúmum tíu mínútum fyrir leikslok brast stíflan. Þá skallaði Smalinn úr Mývatnssveitinni. Baldur Sigurðsson, boltann í netið eftir hornspyrnu frá Óskari Erni Haukssyni.

Fleiri urðu mörkin ekki og KR fer með gott veganesti í síðari leikinn.