Geir útilokar ekki auðlindaákvæði í stjórnarskrá

Geir H. Haarde forsætisráðherra útilokar ekki að auðlindaákvæði verði sett í stjórnarskrá svo lengi sem það raski ekki núverandi fiskveiðistjórnunarkerfi. Stjórnarandstaðan bauðst í gær til að greiða götu frumvarps um breytingar á stjórnarskránni, hvað varðar sameign þjóðarinnar á auðlindum sjávar, í þinginu, jafnvel þótt lengja þyrfti starfstíma þingsins um einhverja daga.

Fulltrúar stjórnarandstöðunnar i stjórnarskrárnefndinni buðust til að koma Framsóknarflokknum til bjargar í gær. Geir segir ekki ljóst hvað mikil alvara sé að baki. Hann bendir á að í orðum stjórnarandstöðunnar sé Framsókn annars vegar hrósað og svo í hina röndan sé hæðst að flokknum fyrir að vera að beita trixum. Menn viti ekki alveg hvað eigi að taka mikið mark á því en hann voni að stjórnarandstöðunni sé einhver alvara með því sem hún segi.

Geir var spurður að því á ríkisstjórnarfundi í morgun hvort hann útilokaði þá ekki útrétta sáttahönd stjórnarandstöðunnar og hann svaraði því til að hann þyrfti ekki sérstaklega á henni að halda. Það væri hins vegar þannig að það væri jafnan breið samstað um stjórnarskrárbreytingar.

Jón Kristjánsson, formaður stjórnarskrárnefndar, sagði í Íslandi í dag í gær að forsætisráðherra hefði verið kunnugt um það fyrir jólin hversu alvarlegum augum framsóknarmenn litu fyrirheit í stjórnarsáttmála um auðlindaákvæðið.

Geir sagði þetta mikið mál núna þótt þetta hefði ekki verið stórt mál í stjónarskrárnefnd. Hann hefði sjálfur verið varaformaður í stjórnarskrárnefndinni í næstum heilt ár og vissi nákvæmlega hvað þar hefði verið í gangi. Þetta mál hefði ekki verið eitt af stóru málunum þar.

Geir var jafnframt spurður út í þau orð Jóns Kristjánssonar í Íslandi í dag í gær þess efnist að hann hefði ekki talið það sitt hlutverk að mynda nýja ríkisstjórn innan stjórnarskrárnefndarinnar. „Það er mjög athyglisvert orðlag," sagði Geir.

„Mér finnst það reyndar ekki viðeigandi en hins vegar er það nú svo að við áttum fund í desember, formenn stjórnarflokkanna og formaður og varaformaður stjórnarskrárnefndar, til þess að fara yfir stöðu mála í nefndinni. Ég ætla ekki að rekja nánar þann fund, sem var ágætur, en það er fyrst núna upp á síðkastið sem ég hef orðið var við að þetta sé orðið að gríðarlegu aðalatriði hjá Framsóknarflokknum. Þá reynum við bara að koma til móts við það í anda þess góða samstarfs sem við höfum átt hér í öll þessi ár," sagði Geir.