Robinho óhress með söluna á Elano

Brasilíumaðurinn Robinho hjá Manchester City er ekki sáttur með að sjá á eftir landa sínum, liðsfélaga og vini Elano frá félaginu en hann var seldur til Galatasaray fyrr í vikunni.

Robinho reyndi að fá knattspyrnustjórann Mark Hughes til þess að koma í veg fyrir söluna en allt kom fyrir ekki.

„Ég er mjög sorgmæddur yfir því að Elano sé farinn því hann er frábær leikmaður og góður vinur minn til margra ára. Ég var sannfærður um að Elano væri stór hluti af framtíðarplönum félagsins og reyndi meira að segja að tala við Hughes þegar ég heyrði af þessum samningum en það var ekkert hægt að gera þá því forráðamenn félagsins voru búnir að gefa grænt ljós á sölu.

Ég óska Elano annars velfarnaðar og er viss um að hann eigi eftir að slá í gegn hjá sínu nýja félagi," segir Robinho í viðtali við Daily Mirror.