Owen: Efasemdarmennirnir eiga eftir að sjá á eftir orðum sínum

Framherjinn Michael Owen hjá Manchester United segist í viðtali í nýjasta hefti FourFour Two aðeins þurfa að sanna sig fyrir þeim sem höfðu trú á sér en ekki þeim sem afskrifuðu hann.

Hann segist ekkert spá í hvað efasemdarmennirnir hefðu að segja um hann þegar staðfest var að hann myndi fara til United en er sannfærður um að þeir muni sjá á eftir orðum sínum.

Owen er þar að tala um knattspyrnustjórann Sam Allardyce hjá Blackburn og stjórnarformanninn Dave Whelan hjá Wigan.

Allardyce efast um að hinn 29 ára gamli Owen nái að spila meira en 36 leiki á næsta tímabili og Whelan efast um hvort að leikmaðurinn hafi sama hungrið og áður.

„Ef þetta er þeirra skoðun þá er það bara allt í lagi. Ég hef engar áhyggjur af því og þarf ekki að sanna neitt fyrir þeim. Það besta er að Sir Alex Ferguson er ekki sammála þeim og það er nóg fyrir mig. Ég held annars að þeir eigi eftir að sjá á eftir orðum sínum og jafnvel skammast sín fyrir þau síðar meir," segir Owen.