Bílainnflutningur slær öll met

Vöruskiptajöfnuður í tímabilinu janúar-júní var neikvæður um 34,3 milljarða á þessu ári, sem er 21 milljarði meiri halli en á sama tíma í fyrra. Í júnímánuði einum voru voruskiptin neikvæð um 10,2 milljarða, sem er mesti vöruskiptahalli sem um getur í einum mánuði hér á landi. Mestu munar um innflutning á bílum og eldsneyti. "Það hefði mátt búast við mun meiri halla hefði sjávarútvegur ekki verið að eflast," segir Snorri Jakobsson, hagfræðingur hjá greiningardeild KB banka. "Það er fátt annað sem kemur á óvart." Snorri segir það fyrst og fremst hátt gengi, stóriðjuframkvæmdir, hækkandi eldsneytisverð á heimsmarkaði og almenna bjartsýni sem valdi vöruskiptahallanum. "Við höfum séð bílainnflutning aukast mjög lengi." Hann segir heildarverðmæti innfluttra bíla nú tvöfalt meira en á árunum 1999-2000, sem voru metár. Snorri segir þetta þó ekki endilega vera slæmt. "Það er að koma fjármagn inn í landið á móti þessum vöruskiptum vegna stóriðjuframkvæmda og með lántökum en fyrr eða síðar mun ójafnvægi í inn- og útflutningi leiða til þess að gengi krónunnar sígi." Hækkandi gengi hefur valdið vandræðum í sjávarútvegi en ef marka má hagtölurnar virðist sjávarútvegurinn standa þetta ágætlega af sér. Útflutningsverðmæti sjávarafurða er aðeins að lækka um 350 milljónir miðað við sama tíma í fyrra - hefði gengið staðið í stað hefði verðmæti hans aukist um 8,4 prósent. "Í ársbyrjun höfðu menn væntingar um að þetta yrði gott ár," segir Sveinn Hjörtur Hjartarson, hagfræðingur LÍÚ. Hann segir gengið nú vera 16 prósentum hærra en menn hafi áætlað þá. Einhverjir útgerðarmenn séu að bæta vöruskiptajöfnuð hagkerfisins með útflutningi sem skilir tapi þar sem viðskiptasamningar hafi verið gerðir fram í tímann á grundvelli rangra væntinga. "Það eru vonbrigði að útflutningsverðmæti skuli standa í stað og líklega eru þetta tíu til ellefu milljarðar sem sjávarútvegurinn er að tapa vegna hás gengis."