Vegagerðin hugsar málið

Um miðja næstu viku er fyrirhugaður fundur lögmanns Reykjavíkurborgar og lögmanna olíufélaganna um skaðabótakröfu borgarinnar vegna ólöglegs verðsamráðs félaganna. Að sögn Vilhjálms H. Vilhjálmssonar, lögmanns borgarinnar, varð ekki af fyrirhuguðum fundahöldum í vikunni sem er að líða. Borgin krefur félögin þrjú, Skeljungs, Esso og Olís, eða eignarhaldsfélög þeirra um 150 milljón krónur í bætur.

Jón Rögnvaldsson vegamála­stjóri segir hugsanlega skaðabóta­kröfu Vegagerðarinnar vegna samráðsins lítillega hafa verið skoðaða, en Vegagerðin bíði enn og sjái til hvernig mál þróast hjá öðrum. "En það hafa ekki verið teknar um þetta neinar ákvarð­anir. Málið er mjög flókið. Annars vegar er bein notkun okkar og hins vegar náttúrlega notkun verktaka sem fyrir okkur vinna," segir hann og telur að mis­mun­andi kunni að vera eftir stofnunum hvort þær sæki bætur sjálfar, eða hvort það verði gert undir hatti ráðuneytis.

Í skýrslu samkeppnisyfirvalda um verðsamráð olíufélaganna er tekið fremur skýrt dæmi um samráð varðandi verð á White Spritti til Vegagerðarinnar. "Já, við kaupum það líka, en það er bara einn dropinn í hafið," segir vegamálastjóri.

Geir H. Haarde, þá fjármálaráðherra, sagði í svari við fyrirspurn á Alþingi í febrúar að lögfræðingar ríkisins myndu meta réttarstöðu þess vegna samráðsins. Ekki náðist í fulltrúa ráðuneytisins síðdegis í gær.