Frakkar vilja gefa út ævisögu Guðmundar Felix

Guðmundur Felix Grétarsson sem nú dvelur í Frakklandi þar sem hann bíður eftir handaágræðslu hefur verið boðið að gefa út ævisögu sína af bókaforlagi þar í landi.

Það er bókaútgefandinn Les Arénes sem hefur lýst yfir áhuga á því að gefa út sögu Guðmundar Felix. Í bókinni yrði fjallað yrði um líf Guðmundar Felix fyrir og eftir slysið sem hann varð fyrir árið 1998 og aðdragandann að aðgerðinni sem hann að bíða eftir að komast í.

„Ég fékk heimsókn í morgun frá manni frá bókaforlaginu sem hafði frétt af mér í gegnum franska félaga sína sem eru að vinna að heimildarmyndinni sem á að gera um aðgerðina,“ segir Guðmundur Felix.

Guðmundi Felix líst mjög vel á að skrifa sögu sína. Í sögunni vill hann fjalla um það meðal annars hvernig von getur kviknað í vonlausum aðstæðum og hvernig vonin getur breytt hlutum. Hvernig hægt er að snúa ómögulegum aðstæðum upp í ævintýri. Hann telur að þetta sé saga sem gæti náð til margra sem eiga við erfið verkefni að kljást, þó þau séu ekki endilega þau sömu og hann hefur gengið í gegnum.

„Ég myndi vilja fá íslenskan rithöfund til þess að skrifa bókina. Þar sem sá myndi þekkja staðarhætti heima og samfélagið sem ég kem úr,“ segir hann.

Guðmundur Felix bíður nú eftir að komast á biðlista. Hann ætti að komast á listann í kringum næstu mánaðarmót. Þegar hann er kominn á lista tekur við bið eftir réttum líffæragjafa. Hann veit ekki hversu löng sú bið gæti orðið, allt frá einhverjum vikum og upp í talsvert lengri tíma. 

Hann lætur vel af dvölinni í Frakklandi, hann býr í borginni Lyon ásamt móður sinni.

„Ég hef það ósköp gott hérna, ég er bara að fitna og læra frönsku. Njóta sólarinnar og sumarsins, en hér er yfir 20 stiga hiti þessa dagana,“ segir Guðmundur Felix.

Post by Gudmundur Felix Grétarsson.