Innlent

Segir réttast að gefa Landvernd trukkinn

Kristján Már Unnarsson skrifar
Flutningabíl Aksturs og köfunar var náð upp á þjóðveginn á Hjallahálsi í dag eftir að hann valt þar á föstudag. Loka þurfti Vestfjarðavegi meðan á aðgerðum stóð.
Flutningabíl Aksturs og köfunar var náð upp á þjóðveginn á Hjallahálsi í dag eftir að hann valt þar á föstudag. Loka þurfti Vestfjarðavegi meðan á aðgerðum stóð. Mynd/Gísli Ásgeirsson

„Bíllinn var kyrrstæður. Hann hafði stoppað til að víkja fyrir þremur öðrum bílum sem voru að koma á móti. Þá bara seig vegkanturinn undan honum. Þetta er algjört rugl,“ sagði Gísli Ásgeirsson, eigandi og framkvæmdastjóri flutningafyrirtækisins Aksturs og köfunar, staddur á Hjallahálsi á Vestfjörðum á þriðja tímanum í dag.

Gísli var ásamt samstarfsmönnum að ljúka við að fjarlægja flutningabíl frá fyrirtækinu sem valt þar á föstudag. Farmurinn var 20 tonn af laxi frá Arctic Fish á leið frá Bíldudal til Þorlákshafnar.

Flutningabíllinn á hliðinni á Hjallahálsi í gær. Fjær má sjá Þorskafjörð og hluta Teigsskógar þar sem lengi hefur staðið til að leggja nýjan láglendisveg í stað fjallvegarins.Reykhólavefurinn/Sveinn Ragnarsson

Hjallaháls er 336 metra hár fjallvegur milli Þorskafjarðar og Djúpafjarðar. Vegagerðin hefur lengi áformað að leggja fjallveginn af með lagningu láglendisvegar um Teigsskóg.

Hér sést hvernig vegkanturinn gaf sig undan trukknum.Gísli Ásgeirsson

„Bíllinn er ónýtur en laxinn er að mestu óskemmdur. Björgunarsveitarmenn í Reykhólasveit björguðu farminum. Þeir voru fljótir að því enda alvöru menn og aldir upp í sveit. Laxinn nær meira að segja í skipið í Þorlákshöfn áður en það fer,“ sagði Gísli og þakkar fyrir að enginn hafi slasast.

Hann segir að á föstudag hafi níu flutningabílar flutt lax suður en aðeins hafi verið pláss fyrir sex þeirra með ferjunni Baldri, milli Brjánslækjar og Stykkishólms. Því hafi þeir neyðst til að láta þrjá bíla aka þjóðveginn, sem bílstjórarnir vilji í lengstu lög forðast.

Gísli er óhress með þann drátt sem orðið hefur á endurbótum vegakerfisins á sunnanverðum Vestfjörðum. Hann segir þetta þriðja bílinn sem fyrirtækið missi á þessari leið á síðustu átta árum. Einnig hafi undirverktakar misst þarna flutningabíla.

„Það væri réttast að færa Landvernd trukkinn að gjöf. Þetta má skrifast á þeirra reikning. Ætli við förum ekki bara með hann suður og skiljum hann eftir á bílaplaninu hjá framkvæmdastjóra Landverndar,“ sagði eigandi Aksturs og köfunar en fyrirtækið er með höfuðstöðvar á Patreksfirði.

Flutningabílnum náð upp í dag.Gísli Ásgeirsson

Í viðtali við framkvæmdastjóra Landverndar í síðasta mánuði kom fram að samtökin teldu að kærumöguleikar til að koma í veg fyrir vegagerð um Teigsskóg væru að öllum líkindum uppurnir eftir að úrskurðarnefnd umhverfis- og auðlindamála hafnaði öllum kröfum um ógildingu framkvæmdaleyfis til Vegagerðarinnar.

Ákvörðun Landverndar síðastliðið vor um að kæra framkvæmdaleyfi Vestfjarðavegar um Teigsskóg kallaði fram reiðibylgju í athugasemdadálkum vestfirska fréttamiðilsins Bæjarins besta, eins og lesa má um í þessari frétt:


Tengdar fréttir

Óvíst hvort dómsmálum vegna Teigsskógar sé lokið

Landvernd telur að kærumöguleikar til að koma í veg fyrir vegagerð um Teigsskóg séu að öllum líkindum uppurnir. Vegagerðarmenn telja þó að þetta umdeilda verk geti enn ratað fyrir dómstóla.

Framkvæmdaleyfi vegna Teigsskógar stendur

Úrskurðarnefnd umhverfis- og auðlindamála hefur hafnað kröfu Landverndar um ógildingu ákvörðunar sveitarstjórnar Reykhólahrepps að veita framkvæmdaleyfi fyrir vegi um Teigsskóg.

Bjóða út fyrsta áfanga vegar í Gufudalssveit

Vegagerðin hefur boðið út endurbyggingu og breikkun Vestfjarðavegar á 6,6 kílómetra kafla frá Gufudalsá að Skálanesi. Þetta er fyrsti áfanginn í hinu umdeilda verkefni um Teigsskóg.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×