Höfðum heppnina með okkur í fyrstu tveimur mörkunum

Christian Eriksen var ánægður með frammistöðu danska liðsins í 3-0 sigrinum gegn Íslandi í kvöld en viðurkenndi að Danir hefðu haft heppnina með sér í fyrsta og jafnvel öðru marki leiksins.

„Ég myndi segja að boltinn hafi verið inni,“ sagði þessi magnaði miðjumaður Inter, léttur í bragði, þegar hann var spurður um fyrsta mark leiksins. Dómarar leiksins dæmdu mark en ekki var að sjá á sjónvarpsmyndum að boltinn hefði farið inn fyrir línuna, þegar Danir komust í 1-0 í lok fyrri hálfleiks.

„Nei, ég veit ekki. Það þarf marklínutækni til að meta svona atvik. Við höfðum heppnina með okkur. Þetta breytti svolítið taktinum í leiknum. Þeir [Íslendingar] þurftu að koma framar í seinni hálfleiknum, við vorum aftur svolítið heppnir með að fá mark númer tvö, og eftir það sigldum við lygnan sjó,“ sagði Eriksen.

Þetta var mjög langur sprettur

Hann skoraði einmitt annað mark Dana, eftir að íslenska liðið var allt komið saman í eða við vítateig Dana.

„Þetta var langur sprettur, mjög langur, eftir stórkostlega stoðsendingu frá Höjberg, eða það er það sem hann segir,“ sagði Eriksen léttur. „Ég hafði ansi mikinn tíma til að hugsa um hvert ég ætlaði að skjóta en sem betur fer tók ég rétta ákvörðun.“

Aðspurður um lykilinn að sigrinum sagði Eriksen: „Í fyrri hálfleiknum fannst mér við vera beinskeyttari en íslenska liðið og vera meira skapandi, þó að Ísland hafi alveg fengið sín færi. Við reyndum að hreyfa boltann hratt — Íslendingar treystu á lengri sendingar og að vinna „seinni boltann“ — og reyndum að skapa meira. Þetta voru ólíkir leikstílar.“

Danmörk hefur aldrei tapað fyrir Íslandi í knattspyrnu karla og miðað við leikinn í kvöld er það ekki að fara að breytast í bráð:

„Við ætlum ekki að láta það breytast í framtíðinni. Við viljum vinna alla leiki sem við getum, hvort sem það er gegn Íslendingum eða öðrum.“