Gylfi: Heyrði ekki hvað Gary Neville sagði um mig

Gylfi Þór Sigurðsson segist ekki lesa ensku blöðin eða hlusta á knattspyrnusérfræðinga í sjónvarpinu. Gagnrýnin á íslenska landsliðsmanninn fer því framhjá honum sem er kannski eins gott miðað við síðasta tímabil.

Íslenski landsliðsmaðurinn Gylfi Þór Sigurðsson hefur ekki verið að spila sína náttúrulegu stöðu síðan að Carlo Ancelotti tók við liði Everton og hann ræddi nýja hlutverkið í viðtali við staðarblaðið í Liverpool.

Gylfi Þór Sigurðsson minnti heldur betur á sig um helgina þegar hann skorað tvö mörk og lagði upp eitt að auki í æfingarleik með Everton. Hann ræddi líka stöðu sína við Liverpool Echo blaðið.

Gylfi talaði við blaðamann Liverpool Echo um nýju leikstöðina sem Carlo Ancelotti lét hann spila á síðasta tímabili. Ancelotti færði Gylfa aftar á völlinn og hann kom oft ekki mikið við sögu þegar kom að því að klára sóknir Everton liðsins.

Það var vissulega auðvelt að benda á það að tölurnar yfir mörk og stoðsendingar hrundu á síðustu leiktíð eftir þrettán marka og sex stoðsendinga tímabil 2018-19 en Gylfi endaði með tvö mörk og þrjár stoðsendingar. Gylfi segir líka að hann hafi þurft að fjarlægast sinn náttúrulega leik til að geta skilað nýju stöðunni.

Marco Silva spilaði 4-2-3-1 leikkerfið með Gylfa oftast í holunni en Carlo Ancelotti vill spila 4-4-2. Ancelotti er sagður ætla að styrkja liðið á miðjusvæðinu og þar hafa verið nefndir leikmenn eins og Allan og Abdoulaye Doucoure.

Gylfi var oft harðlega gagnrýndur á síðasta tímabili þar af einu sinni af Gary Neville á Sky Sports sem var allt annað en sáttur með íslenska landsliðsmanninn í tapleik á móti Tottenham í síðasta mánuði. Gylfi sagði viðtalinu við Liverpool Echo að hann hafi ekki heyrt það sem Gary Neville sagði um hann og hann hafi bara áhuga á áliti eins manns sem er skoðun knattspyrnustjórans Carlo Ancelotti.

Gylfi segir að Ancelotti hafi verið ánægður með hann en jafnframt að það hafi reynt á hann að spila ekki sína náttúrulegu stöðu. Ancelotti kom Gylfa líka til varnar í framhaldinu.

„Það er orðið þægilegra fyrir mig að spila þarna núna. Ég hef samt alltaf sagt að þetta er gjörólík staða,“ sagði Gylfi Þór Sigurðsson.

„Þegar vængmennirnir hafa boltann og eru að búa sig undir að gefa boltann fyrir þá er ég vanur að koma mér inn í teig til að reyna að skora. Núna þarf ég hins vegar að halda stöðunni til að passa upp á mögulega skyndisókn mótherjann,“ sagði Gylfi.

„Stundum vil ég samt koma mér inn í teig en þá heyri ég í mönnum eins og Mason segja: Ekki fara, ekki fara, ekki fara. Það er gjörólíkt og þú verður að hugsa leikinn öðruvísi. Mitt starf er núna að reyna að byrja sóknirnar í stað þess að klára þær,“ sagði Gylfi.

Carlo Ancelotti hefur samt ekki rætt mikið við hann um þessa nýju stöðu. „Við höfum ekki talað mikið saman um þetta. Þetta snýst bara um að staðsetja sig rétt, halda stöðu og gera það sem hann vill að ég geri með og án bolta,“ sagði Gylfi.

Gagnrýnin á Gylfa hefur ekki farið framhjá íslensku knattspyrnuáhugafólki en virðist fara framhjá Gylfa sjálfum.

„Ég hef ekki áhyggjur af framtíð minni hér. Stjórinn hefur verið ánægður með mig og ég er augljóslega að spila allt aðra stöðu. Ég les ekki fréttamiðlana,“ sagði Gylfi.

„Það eina sem skiptir máli er skoðun stjórans á mér. Ef hann er ánægður þá er ég að gera eitthvað rétt. Ef hann er ekki ánægður með mig þá þarf ég bara að æfa enn betur og gera betur það sem hann vill að ég geri,“ sagði Gylfi

„Ég hef verið að spila tíuna, áttuna og sexuna á æfingunum. Við tölum samt ekki mikið um þetta. Ég mun bara spila þar sem að hann vill að ég spili,“ sagði Gylfi Þór Sigurðsson.