Fótbolti

Vongóður um að fótboltalið fari í vinnusóttkví og geti spilað

Sindri Sverrisson skrifar
Íslensku landsliðin spila á Laugardalsvelli í september ef að líkum lætur, en fyrir luktum dyrum.
Íslensku landsliðin spila á Laugardalsvelli í september ef að líkum lætur, en fyrir luktum dyrum. Samsett/daníel/vilhelm

Unnið er að því hörðum höndum að fá botn í það hvort að landsleikir og Evrópuleikir í fótbolta geti farið fram hér á landi þrátt fyrir reglur um sóttkví. Víðir Reynisson yfirlögregluþjónn er bjartsýnn á að það gangi upp og segir málið skýrast á næstu dögum.

„Þetta snýst aðallega um það hvort að aðferðafræðin í kringum leiki, þar sem stuðst er við UEFA-reglugerðina, samræmist íslenskum sóttvarnareglum. Það er í vinnslu,“ segir Víðir en aðilar á vegum KSÍ, almannavarna og sóttvarnalæknis vinna í málinu sem hefur gríðarmikla þýðingu fyrir knattspyrnuna á Íslandi.

Víðir segir að það gæti skýrst í dag hvort að Íslandsmeistarar KR fái að vera í svokallaðri vinnusóttkví í stað heimasóttkvíar, eftir komuna til landsins frá Skotlandi í nótt. KR-ingar fengju þá að æfa saman, en útilokað virðist að þeir spili gegn öðru liði fyrr en fimm daga sóttkví lýkur. Stórleik KR og Vals, sem fara átti fram á laugardag, verður því eflaust frestað.

KR-ingar mættu Celtic í gærkvöld og máttu sætta sig við 6-0 tap.mynd/celtic FC

Í næstu viku er von á félagsliði frá Slóvakíu vegna Evrópuleiks við FH, auk þess sem leikmenn Breiðabliks og Víkings R. snúa þá heim úr Evrópuleikjum í Noregi og Slóveníu.

Í byrjun næsta mánaðar hefst svo mikil landsleikjatörn með tilheyrandi ferðalögum íslenskra atvinnumanna til landsins, og erlendra landsliða. A-landslið karla á að taka á móti Englandi 5. september, U21-landslið karla mætir Svíum degi áður, og A-landslið kvenna fær Lettland og Svíþjóð í heimsókn 17. og 22. september.

Knattspyrnufólk á leið í leiki sem þessa, á vegum Knattspyrnusambands Evrópu (UEFA), þarf að fylgja eftir ströngum smitvarnareglum UEFA vegna kórónuveirufaraldursins, hvort sem það heitir Gylfi Þór Sigurðsson, Sara Björk Gunnarsdóttir eða Raheem Sterling.

Raheem Sterling og Harry Kane koma væntanlega með enska landsliðinu til Íslands í byrjun september.VÍSIR/GETTY

„Bæði íslensku og erlendu landsliðin koma og eru í sóttkví á hótelum, geta svo æft og fengið alla þjónustu senda utan frá, og eru því ekki í umgengni við neinn. Þau spila síðan leikinn og fara svo heim. Svona er þetta samkvæmt þessum UEFA Return to Play reglum, og samræmist líka reglugerðinni hér þar sem fjallað er um vinnusóttkví,“ segir Víðir, og vísar til glænýrrar reglugerðar heilbrigðisráðuneytisins um sóttkví og einangrun og sýnatöku við landamæri Íslands vegna COVID‑19.

Það er í höndum sóttvarnalæknis að heimila fólki að fara í vinnusóttkví, eins og lesa má í 7. grein reglugerðarinnar hér að neðan, og Víðir er bjartsýnn á að knattspyrnuhreyfingin geti aðlagað sig að þeim skilyrðum sem sett eru.

Úr reglugerð um sóttkví og einangrun og sýnatöku við landamæri Íslands vegna COVID‑19:

Sóttvarnalæknir getur heimilað einstaklingum, einum eða fleiri saman, sem skylt er að fara í sóttkví og eru komnir hingað til lands til starfa eða til að sinna sérstökum verkefnum að fara í vinnusóttkví í stað heimasóttkvíar. Með vinnusóttkví er átt við að viðkomandi geti farið til og frá vinnustað á meðan sóttkví stendur.

Skilyrði fyrir vinnusóttkví eru að:

  • a. Viðkomandi umgangist ekki aðra en heimilisfólk eða þá sem eru með þeim í vinnusóttkví.
  • b. Viðkomandi dveljist einungis á gististað og vinnustað meðan á sóttkví stendur.
  • c. Viðkomandi fylgi öðrum ákvæðum 5. og 6. gr. eftir því sem við á sem og leiðbeiningum um sóttvarnaráðstafanir sem gefnar eru út af sóttvarnalækni vegna vinnusóttkvíar.
  • d. Sótt sé um heimild fyrir vinnusóttkví til sóttvarnalæknis.

Málið er í raun einfaldara hvað varðar komur fólks vegna leikja hér á landi, þar sem hægt er að tryggja að leikmenn blandist ekki við aðra í samfélaginu, en hvað varðar Evrópuferðir leikmanna sem búa hér á landi.

Sýnist margt benda til að hægt sé að aðlagast skilyrðum

„Þetta hefur verið aðeins snúnara eins og í tilviki KR-inganna, þar sem sóttkvíin byrjar ekki að telja fyrr en þeir koma heim og þeir eru í raun ekki í sams konar búblu hér heima og úti. En það er verið að skoða möguleikann á að þeir geti farið í vinnusóttkví, og þannig æft saman. Það er unnið á fullu í þessum undanþágubeiðnum, nú þegar við höfum fengið reglugerðina í hendurnar.

Við höfum beðið eftir reglugerðinni og fengum hana ekki endanlega afhenda fyrr en seinni partinn í gær. Undanþáguheimildirnar í reglugerðinni gera ráð fyrir svokallaðri vinnusóttkví, sem hefur verið notuð töluvert hér á landi vegna ýmiss konar starfsemi. Hingað hefur til dæmis komið hópur að vinna við raforkukerfið – þar sem menn eru bara saman á hóteli, ferðast saman og vinna saman. Það er verið að horfa til svipaðrar útfærslu varðandi þetta.

Mér sýnist margt benda til þess að liðin geti aðlagað sig að þeim skilyrðum sem sett eru en það fylgja þessu auðvitað kvaðir fyrir félögin og KSÍ, og þessu fylgir heilmikill kostnaður,“ segir Víðir.


Tengdar fréttir




Fleiri fréttir

Sjá meira


×