Innlent

Brotlending þotu Icelandair núna skilgreind sem flugslys

Kristján Már Unnarsson skrifar
Ragnar Guðmundsson stýrir rannsókninni hjá Rannsóknarnefnd samgönguslysa.
Ragnar Guðmundsson stýrir rannsókninni hjá Rannsóknarnefnd samgönguslysa. Stöð 2/Friðrik Þór Halldórsson.

Brotlending farþegaþotu Icelandair á Keflavíkurflugvelli í síðustu viku þykir það alvarleg að hún hefur núna verið skilgreind sem flugslys. Mildi þykir að flugmönnunum skyldi takast að halda vélinni á brautinni, eftir að hjólabúnaðurinn gaf sig. Frá þessu var greint í fréttum Stöðvar 2. 

160 farþegar og sex manna áhöfn voru um borð í Boeing 757-vélinni síðastliðinn föstudag þegar hjólabúnaðurinn hægramegin gaf sig í lendingu. Rannsóknarnefnd samgönguslysa hefur nú lokið vettvangsrannsókn og var vélin afhent Icelandair á ný í dag. Áhöld voru um hvort þetta flokkaðist sem alvarlegt flugatvik eða flugslys, samkvæmt alþjóðlegri skilgreiningu flugslysarannsakenda.

„Af þeim skemmdum, sem erum búin að sjá á loftfarinu frá því að rannsókn hófst, þá sýnist okkur að þetta flokkist sem flugslys,“ segir Ragnar Guðmundsson, stjórnandi rannsóknarinnar.

Frá Keflavíkurflugvelli á föstudag.@LEVERFLYER Á IG

Á flugvellinum var rauðu hættustigi lýst yfir.

„Þetta hefði náttúrlega geta orðið miklu alvarlegra, já. Til dæmis ef þeir hefðu misst flugvélina af flugbrautinni þar sem hún kom fyrst, - sem sagt þar sem lendingin átti sér stað.“

Mildi þykir að flugmönnunum skyldi takast, með brotinn hjólabúnað, að halda vélinni á brautinni. En má álykta að þeir hafi hugsanlega þannig afstýrt jafnvel stórslysi?

„Það er kannski of fljótt að segja til um það. En ég ætla ekki að neita því,“ svarar Ragnar.

Flugritar vélarinnar, svörtu kassarnir svokölluðu, eru varðveittir í húsakynnum rannsóknarnefndarinnar á Reykjavíkurflugvelli, en þeir verða sendir til Bretlands í næstu viku til greiningar.

Frá stórskoðun Boeing 757-þotu í skýli Icelandair á Keflavíkurflugvelli. Í tilviki vélarinnar sem brotlenti á föstudag var skoðunin gerð hjá fyrirtæki á vesturströnd Kanada.Mynd/Stöð 2.

Ragnar staðfestir að tveir hlutir úr hjólastelli hafi fundist á öðrum stað en flugvélin staðnæmdist á og einnig að vélin var nýkomin úr stórskoðun í Kanada, svokallaðri C-skoðun, þar sem skipt var um lendingarbúnað.

„Þeirri skoðun lauk þann 6. janúar síðastliðinn og síðan er búið að fljúga flugvélinni 63 flug.“

En þýðir þetta að rannsóknin beinist að því hvernig endurnýjun lendingarbúnaðarins var framkvæmd í Kanada?

„Það er akkúrat eitt af því sem við erum að skoða,“ svarar Ragnar.

Hér má sjá frétt Stöðvar 2:


Tengdar fréttir

Skiptu nýlega um lendingarbúnað

Vél Icelandair TF-FIA hafði flogið rúmlega sextíu ferðir eftir að skipt hafði verið um lendingarbúnaði í vélinni í lok síðasta árs

„Lykilatriði að enginn slasaðist“

Bogi Nils Bogason, forstjóri Icelandair, segir það fyrir öllu að engin slys hafi orðið á fólki þegar lendingarbúnaður flugvélar félagsins brotnaði skömmu eftir lendingu.

Aldur vélarinnar hafi ekki verið örlagavaldur

Óhapp gærdagsins ætti ekki að hafa teljandi áhrif á flugáætlun Icelandair að sögn forstjóra félagsins. Þrátt fyrir að aldur vélarinnar fylli tvo tugi ætlar hann að aldurinn hafi ekki örlagavaldur. Vélin hvílir enn á flugbrautinni en gert er ráð fyrir að hún verði flutt um helgina.




Fleiri fréttir

Sjá meira


×