Jóhann Berg stefnir á að njóta þess að spila á Eng­landi næstu árin

Landsliðsmaðurinn Jóhann Berg Guðmundsson hefur átt hálfgert martraðar tímabil með enska úrvalsdeildarfélaginu Burnley þó svo að liðinu hafi gengið framar vonum á nýafstöðnu tímabili.

Liðið lenti í 10. sæti með 54 stig, líkt og Sheffield United en aðeins lakari markatölu. Jóhann Berg byrjaði aðeins sex leiki fyrir Burnley hins vegar ásamt því að koma af sex sinnum af bekknum. Hann byrjaði þó síðustu tvo leiki deildarinnar ásamt því að koma inn af bekknum í tveimur leikjum þar á undan.

Alls komu 220 af þeim 623 mínútum sem Jóhann lék á tímabilinu í síðustu fjórum leikjum deildarinnar.

„Þegar þú lendir í meiðslum færðu venjulega ákveðinn tímaramma, fimm til sex mánuðir eða hvað sem það er. Ég hef hins vegar lent í allskyns vöðvameiðslum, hef snúið til baka og lent aftur í meiðslum,“ sagði Jóhann Berg í viðtali við vef Burnley.

Þar ræðir hann einnig þær styrktaræfingar sem hann hefur verið að gera. Hann hefur verið að vinna mikið í miðsvæði líkamans, í kringum mjaðmirnar og rassinn.

„Vonandi er þetta búið núna. Við höfum unnið mikið í skrokknum á mér, ég og allir sjúkraþjálfararnir.“

„Þetta var frábært tímabil, held við getum öll verið sammála um það. Það hefur verið erfitt að vinna okkur og við höfum einnig skorað nokkur mörk sjálfir. Við erum með fjóra frábæra framherja sem hafa allir komist nokkrum sinnum á blað. Við höfum verið góðir á öllum sviðum vallarins og þetta er líklega eitt besta tímabil í sögu félagsins myndi ég halda.“

Jóhann Berg vill njóta þeirra ára sem hann á eftir.

„Ég vill bara njóta fótboltans. Ég er 29 ára gamall og verð þrítugur í október. Ég vill vera á vellinum eins lengi og mögulegt er. Njóta þess að spila í úrvalsdeildinni sem er besta deild í heimi fyrir mér. Ég vill bara njóta þess í nokkur ár í viðbót,“ sagði landsliðsmaðurinn að endingu.