Viðar Örn og félagar fallnir úr tyrknesku úrvalsdeildinni

Yeni Malatyaspor, sem Viðar Örn Kjartansson leikur með, er fallið úr tyrknesku úrvalsdeildinni í fótbolta eftir tap í lokaumferðinni í kvöld.

Liðið mætti Gaziantep FK á heimavelli og þurfti nauðsynlega á sigri að halda til að eiga einhvern möguleika á að halda sæti sínu í deildinni. Niðurstaðan var 0-1 tap þar sem Papy Djilobodji skoraði eina mark Gaziantep á 63. mínútu. Viðar Örn var í byrjunarliðinu og lék allan leikinn fyrir Yeni.

Yeni endaði tímabilið í 17. sæti, næstneðsta sæti, með 32 stig, þremur stigum frá öruggu sæti. Istanbul Basaksehir var búið að tryggja sér Tyrklandsmeistaratitilinn fyrir lokaumferðina.