Íslenski boltinn

Telja rauðu spjöldin ekki hafa átt rétt á sér | Sölvi Geir biðst af­sökunar

Runólfur Trausti Þórhallsson skrifar
Sölvi Geir hefur beðist afsökunar á framferði sínu eftir að hann fékk rautt spjald gegn KR um helgina.
Sölvi Geir hefur beðist afsökunar á framferði sínu eftir að hann fékk rautt spjald gegn KR um helgina. Vísir/Bára

Knattspyrnudeild Víkings gaf frá sér yfirlýsingu varðandi rauðu spjöldin sem liðið fékk í 2-0 tapi gegn KR í Pepsi Max deildinni um helgina. Þar furðar félagið sig á framgöngu dómara leiksins og telur það að öll rauðu spjöldin sem fóru á loft hafi ekki átt rétt á sér. 

Einnig kemur fram að félagið harmi framgöngu Sölva Geirs Ottesen, fyrirliða liðsins, eftir að hann fékk að lýta rauða spjaldið. Sölvi sjálfur tekur undir það og hefur beðist afsökunar. Báðar yfirlýsingar má finna hér að neðan í fréttinni.

Í leiknum mættust ríkjandi Íslandsmeistarar KR og bikarmeistarar Víkings. Fyrir leikinn höfðu KR unnið þrjá leiki í röð gegn Víkingum, alla 1-0. Eina breytingin um helgina var sú að KR vann 2-0 og markaþurrð Víkinga gegn Íslandsmeisturunum heldur áfram. 

Víkingar fengu hins vegar þrjú rauð spjöld í leiknum sem segja má að hafa breytt gangi leiksins. Á 27. mínútu leiksins fékk Kári Árnason rautt spjald fyrir - að því virtist - að toga í Kristján Flóka Finnbogason, framherja KR, sem var við það að sleppa í gegn. Kristján Flóki hefur viðurkennt að hann fór full auðveldlega niður í atvikinu.

Sjá einnig: Ósáttur Kári: Dómararnir eyðilögðu leikinn

Það var svo á 77. mínútu sem Sölvi Geir Ottesen fékk rautt spjald fyrir að slá Stefán Árna Geirsson í andlitið, að mati dómara leiksins allavega. Sölva Geir var augljóslega ýtt af Pablo Punyed sem leiddi til þess að Sölvi fór með hendina í andlitið á Stefáni. 

Eftir atvikið átti Sölvi svo í orðaskaki við fjórða dómara leiksins áður en hann gekk til búningsklefa. Hefur Sölvi nú beðist afsökunar á þeim orðum sem hann lét falla. 

Þá fékk Halldór Smári Sigurðsson rautt spjald fyrir harða tæklingu á Kennie Chopart en Halldór Smári fór fyrst í boltann áður en hann lenti á bakverðinum sem þurfti að yfirgefa völlinn eftir tæklinguna. 

Yfirlýsing knattspyrnudeildar Víkings

Knattspyrnudeild Víkings lýsir yfir furðu sinni með framgöngu dómara í leik KR og Víkings á laugardag og skorar á dómaranefnd KSÍ að fara rækilega yfir málin. Að sama skapi teljum við framkomu Sölva Geirs Ottesen í kjölfar rauða spjaldsins sem hann fékk í leiknum óásættanlega. Það er ljóst að félagið verður án þriggja sterkra leikmanna á miðvikudag í leiknum gegn Val þar sem allir leikmennirnir eru á leið í leikbann. Það er skoðun okkar að dómarinn hafi gert mistök þegar hann lyfti rauða spjaldinu í öllum tilfellum. Mistök sem geta reynst félaginu ákaflega dýr.

Yfirlýsing Sölva Geirs

“Ég harma framgöngu mína eftir að hafa fengið brottvísun í leik KR og Víkings sl. laugardagskvöld. Í hita leiksins snarreiddist ég þar sem ég taldi mig órétti beittan eftir að leikmaður KR ýtti mér svo ég féll á annan leikmann liðsins. Dómari leiksins mat það sem viljaverk að vinstri handleggur minn hafi lent í anditi leikmanns KR sem lá á vellinum. Ég átti hins vegar ekkert sökótt við leikmanninn, ásetningurinn var enginn og ég var aðeins að reyna að verjast falli. Þrátt fyrir öll málsatvik á leikmaður með mína reynslu, og fyrirliði Víkings, hins vegar að vita betur og viðbrögð mín í hita leiksins voru mér, liðsfélögum og Knattspyrnufélagi Víking ekki til sóma”.

Víkingar verða þar með án sinna reynslumestu manna er liðið mætir Val á miðvikudaginn en sá leikur er í beinni útsendingu Stöðvar 2 Sport. Þá er óvíst hver verður í miðverði liðsins en Tómas Guðmundsson er eini miðvörðurinn sem er ekki í leikbanni gegn Val.


Tengdar fréttir

Rúnar: Við fyrstu sýn voru þetta allt rauð spjöld

Þrátt fyrir sigurinn á Víkingi var þjálfari KR langt frá því að vera sáttur með frammistöðu sinna manna. Hann sagði að rauðu spjöldin þrjú sem Víkingar fengu hafi verið rétt.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.