Íslenski boltinn

Pepsi Max kvenna eftir 9 daga: Meisturunum hefur ekki verið spá titlinum síðustu fjögur ár

Óskar Ófeigur Jónsson skrifar
Systurnar Elísa og Margrét Lára Viðarsdætur með Íslandsbikarinn síðasta haust.
Systurnar Elísa og Margrét Lára Viðarsdætur með Íslandsbikarinn síðasta haust. Vísir/Daníel Þór

Íslandsmótið í knattspyrnu byrjar með opnunarleik Pepsi Max deildar kvenna 12. júní. Það er mikil spenna fyrir því að boltinn fari aftur að rúlla en lengsta undirbúningstímabil í fótboltaheiminum varð enn lengra þökk sé kórónuveirunni.

Vísir ætlar að telja niður í fyrsta leik með því að rifja upp eitt og annað tengdu úrvalsdeild kvenna í knattspyrnu. Í dag eru 9 dagar í fyrsta leikinn sem verður á milli Vals og KR á Hlíðarenda 12. júní næstkomandi.

Valur og Breiðablik voru í sérflokki í Pepsi Max deild kvenna síðasta sumar og það má búast við að öðru hvoru þeirra liða verði spáð Íslandsmeistaratitlinum í árlegri spá fyrirliða, þjálfara og forráðamanna deildarinnar.

Það er samt staða sem liðin vildu kannski forðast ef við skoðun þróun mála undanfarin fjögur tímabil í kvennadeildinni.

Fjögur ár í röð hefur það lið sem var spá titlinum ekki tekist að standast pressuna og vinna Íslandsmeistaratitilinn. Síðasta liðið til að gera það voru Blikakonur sumarið 2015 en þær unnu þá deildina sannfærandi með 50 stig af 54 mögulegum og markatöluna 51-4.

Breiðablikskonum hefur verið spáð Íslandsmeistaratitlinum tvisvar sinnum síðan en hafa misst af honum í bæði skiptin eða 2016 til Stjörnunnar og svo til Vals í fyrrasumar. Þegar Blikarnir unnu titilinn fyrir tveimur árum þá var þeim spáð fjórða sætinu en Þór/KA titlinum.

Valskonum var spáð Íslandsmeistaratitlinum sumarið 2017 en þá endaði Valsliðið í þriðja sætinu og Þór/KA tók Íslandsmeistaratitilinn.

Nú er að sjá hvort að það verði áfram jafnslæmt fyrir liðin í titilbaráttunni að vera spáð Íslandsmeistaratitlinum í þessari árlegu spá fyrirliða, þjálfara og forráðamanna deildarinnar.

Íslandsmeistaraspá fyrirliða, þjálfara og forráðamanna 2015-2019:

  • 2015 Breiðablik spáð titlinum (Breiðablik Íslandsmeistari)
  • 2016 Breiðablik spáð titlinum (Stjarnan Íslandsmeistari)
  • 2017 Val spáð titlinum (Þór/KA Íslandsmeistari)
  • 2018 Þór/KA spáð titlinum (Breiðablik Íslandsmeistari)
  • 2019 Breiðablik spáð titlinum (Valur Íslandsmeistari)


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.