Innlent

Samningsstaða Icelandair gagnvart Boeing styrkist

Heimir Már Pétursson skrifar
Staða flugvélaflota Icelandair skiptir miklu máli áður en farið verður í hlutafjárútboð um mánaðamótin júní/júlí.
Staða flugvélaflota Icelandair skiptir miklu máli áður en farið verður í hlutafjárútboð um mánaðamótin júní/júlí. Vísir/Vilhelm

Forstjóri Icelandair segir að eftir því sem það dragist á langinn hjá Boeing að koma Max flugvélunum á loft styrkist samningsstaða Icelandair sem enn eigi eftir að fá tíu flugvélar afhentar. Staðan gagnvart Boeing eigi að liggja fyrir áður en hlutfjárútboð fyrirtækisins hefst.

Áður en kórónuveirufaraldurinn reið yfir hafði kyrrsetning Max flugvélanna haft mikil áhrif á áætlanir Icelandair sem hafði fengið sex Max flugvélar af sextán afhentar þegar flotinn var allur kyrrettur í mars í fyrra vegna galla í stjórnkerfi. Miklar efasemdir eru meðal flugsérfræðinga í heiminum um að flugvélarnar eigi framtíð fyrir sér og meðal annars þess vegna hefur staða flotamála Icelandair mikið að segja um áhuga fjárfesta á að kaupa hlut í félaginu í fyrirhuguðu hlutafjárútboði upp á allt að 30 milljörðum króna.

Bogi Nils Bogason segir flotamál Icelandair til lengri framtíðar ekki verða ákveðin fyrir hlutfjárútboð félagsins en staðan gagnvart Boeing og afhendingu Max flugvélanna eigi hins vegar að liggja ljós fyrir.Vísir/Vilhelm

Bogi Nils Bogason forstjóri Icelandair sagði á auka hluthafafundi félagsins á föstudag að flotamálin ættu að liggja ljós fyrir innan nokkurra vikna.

Fela samningar félagsins í sér að félagið geti hætt við að kaupa einhvern hluta af þeim flugvélum sem þið eruð með í pöntun?

„Eftir því sem dregst lengur hjá Boeing í rauninni að koma flugvélunum í loftið eykst okkar sveigjanleiki og samningsstaðan styrkist. Það liggur ljóst fyrir að við munum skýra þessa stöðu áður en við förum í hlutafjárútboð,“ segir Bogi.

Icelandair stefni að því að samningar takist við ríkið um aðkomu þess að endurreisn félagsins fyrir 15. júní og að hlutafjárútboðið hefjist í lok þess mánaðar og verði lokið á fyrstu dögum júlímánaðar. Áður en kórónuveirufaraldurinn skall á hafði Icelandair verið með framtíðar flotamál fyrirtækisins til skoðunar, meðal annars hvort félagið hætti áratuga viðskiptum við Boeing og snéri sér að Airbus.

„Við erum búin að vera með þá vinnu í gangi í eitt og hálft ár, varðandi langtíma flotastefnuna. En það í rauninni tengist ekki þessu verkefni núna. Við verðum ekki með neinar tilkynningar í þá áttina fyrir útboðið. Við erum ekki að fara að ganga frá einhverjum stórum pöntunum. En þetta snýr að þessum tíu flugvélum sem við erum með í pöntunum frá Boeing,“ sagði Bogi Nils Bogason eftir hluthafafundinn á föstudag.


Tengdar fréttir

Icelandair stefnir á að hefja flug 15. júní

„Við stefnum á að komast á flug upp úr 15. júní og ná sem fyrst að komast í daglega tíðni til okkar helstu áfangastaða til að byrja með og svo auðvitað fylgjumst við eins og allir aðrir með tilkynningum frá okkar nágrannalöndum um hvenær þau opna,“ segir Birna Ósk Einarsdóttir, framkvæmdastjóri sölu- og þjónustusviðs Icelandair.

Icelandair geti lifað af núverandi ástand til næsta vors

Flugáætlun Icelandair frá því um áramót hefur aðeins verið um þrjú prósent af þeirri áætlun sem lá fyrir um fjölda farþega um áramótin. Venjulega fara flugvélar félagsins í 240 ferðir á viku en þær hafa aðeins verið sex á viku undanfarið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.