Ögmundur og Sverrir Ingi báðir í byrjunarliði í Grikklandi

Að venju voru tveir Íslendingar í eldlínunni í grísku úrvalsdeildinni í dag.

Ögmundur Kristinsson stóð sem fyrr í marki Larissa sem steinlá á útivelli gegn AEK Aþenu. Lokatölur 3-0 þar sem Larissa sá aldrei til sólar. Larissa er sem stendur í 10. sæti deildarinnar með 23 stig.

Sverrir Ingi Ingason lék allan leikinn í hjarta varnarinnar hjá PAOK sem vann öruggan sigur gegnAsteras Tripolis á heimavelli. Lokatölur þar 3-1 og PAOK sem stendur á toppi deildarinnar með 46 stig þegar 19 umferðum er lokið en Olympiacos á leik til góða og getur stolið toppsætinu af PAOK sigri þeir sinn leik.