Bate snéri jafntefli í sigur eftir innkomu Willums

Willum Þór Willumsson virðist heldur betur hafa blásið lífi í leik BATE Borisov í dag er liðið vann 3-1 sigur á Dynamo Brest á útivelli.

Willum byrjaði á bekknum en BATE komst yfir á 31. mínútu. Heimamenn í Dynamo náðu þó að jafna fyrir hlé og staðan var 1-1 þegar Willum Þór kom inn á er rúmar tuttugu mínútur voru eftir.

Pavel Nekhajchik kom Bate í 2-1 á 74. mínútu og sex mínútum síðar skoraði Nemanja Milic þriðja mark Bate og tryggði þeim 3-1 sigur. Bate er á toppi deildarinnar með fjögurra stiga forskot eftir tíu leiki.