Óttast að nárameiðsli Gerrard hafi tekið sig upp

Svo gæti farið að Steven Gerrard, fyrirliði Liverpool, verði frá í einhvern tíma vegna meiðsla en óttast er að nárameiðsli hans hafi tekið sig upp í leiknum gegn Chelsea í Meistaradeild Evrópu í gær.

Gerrard var tæpur fyrir leikinn sem Chelsea vann, 3-1, en honum var skipta af velli í leik Liverpool og Fulham um síðustu helgi vegna ökklameiðsla.

Gerard var frá í febrúar síðastliðnum vegna meiðsla aftan í læri en hann hefur einnig mátt glíma við meiðsli í nára.

Læknar Liverpool eru nú að skoða Gerrard og beðið er með óþreyju eftir því hvort Gerrard geti spilað með sínum mönnum gegn Blackburn í deildinni um helgina og gegn Chelsea í Meistaradeildinni á þriðjudaginn næstkomandi.

„Steven var ekki 100 prósent og Fernando Torres ekki heldur," sagði Rafa Benitez, stjóri Liverpool, eftir leikinn. „Þeir hafa báðir verið að spila vel og því fannst okkur í lagi að nota þá í þessum leik. Við þurftum á þeim að halda. En það var augljóst að þeir voru ekki jafn beittir og áður."