Sjúklingar liggja á kaffistofum

Læknar hafa gríðarlegar áhyggjur af stöðu Landspítalans og skorti á eðlilegu rekstrarfé spítalans. Þetta segir skurðlæknir á spítalanum og að boðskapur þeirra sé ekki að ná í gegn til ráðamanna.

Staða Landspítalans var til umræðu í þætti Sigurjóns M. Egilssonar, Sprengisandi, á Bylgjunni í morgun. Tómas Guðbjartsson, hjarta- og lungnaskurðlæknir var á meðal gesta.

Hann sagði lækna almennt hafa gríðarlegar áhyggjur af spítalanum. Mikilvægt væri að endurnýja húsnæði spítalans en finna mætti mörg dæmi þess að sjúklingar hafi fundið verulega fyrir plássleysinu á spítalanum.

„Móðir vinar míns sem var lögð á gang á hjartadeild og hafði verið á gjörgæslu daginn áður, hún er færð inn á hjartadeild. Það voru margir sjúklingar þar og fjórir sjúklingar á gangi og hún er sett á kaffistofuna beint af gjörgæslunni. Þegar maður gekk inn á þessa deild þá skammaðist maður sín fyrir að þetta gerðist, meira að segja á minni vakt. Það er auðvitað bara staðreynd eins og kom fram í Kastljósi um daginn að rúmanýtingin er yfir 100% á spítalanum en á að vera í kringum 80% á svona stofnun.“

Tómas segir lækna vera að berjast fyrir eðlilegu rekstrarfé fyrir spítalann.

„Við erum eiginlega bara hálf ráðþrota hvernig við eigum að taka á þessu. Það er augljóst að okkar boðskapur er ekki að ná alla leið í gegn, allavega ekki til ráðamanna,“ sagði Tómas Guðbjartsson.