Gríðarstór borgarísjaki nálgast land

Tveir borgarísjakar, annar gríðarstór, sáust frá togara um fimm leitið í morgun, þar sem þeir voru um 40 sjómílur norður af Skaga, á milli Húnaflóa og Skagafjarðar.

Jakana rak á um það bil einnar sjómílu hraða í átt til lands, að sögn skipstjórans á togaranum, sem fann þá. Sá minni er 40 til 50 metrar í þvermál, en hinn er heilir 300 metrar í þvermál og um tíu metrar á hæð að jafnaði, en aðeins einn tíundi hluti ísjaka stendur upp úr hafinu, sem kunnugt er.  Jakinn nær því hátt í hundrað metra niður í sjóinn. Hann rekur í átt til lands, eins og áður sagði, en straumar gætu breytt stenfu hans þegar kemur nær landi.

Jakarnir sjást vel í ratsjám og stafar skipum því ekki hætt af þeim að svo stöddu. Togaraskikpstjórinn hætti sér ekki það nálægt stóra jakanum að sjá mætti hvort þar væru ísbirnir.