Musharraf mun láta af embætti hershöfðingja

Pervez Musharraf mun sverja embættiseið sem forseti Pakistan í þriðja skipti á fimmtudag. Þetta hefur BBC fréttastofan eftir Rashid Qureshi talsmanni Musharrafs. Qureshi sagði jafnframt að Musharraf myndi segja af sér embætti hershöfðingja í landinu áður en hann myndi sverja forsetaeiðinn.

Nawaz Sharif og Benazir Bhutto hafa nú bæði gefið formlega kost á sér í þingkosningunum sem áætlað er að halda í janúar. Bæði hafa þau þó fullyrt að þau muni hætta við áætlanir sínar ef þau telja að kosningarnar verði ekki frjálsar og réttlátar. Musharraf forseti lýsti yfir neyðarlögum í Pakistan þann þriðja nóvember síðastliðinn og sagðist þá vilja koma á röð og reglu í landinu og berjast gegn herskáum múslimum.