30 milljónir söfnuðust eftir Kompásþátt

Um 30 milljónir söfnuðust eftir sýningu Kompásþáttar í vor þar sem hjálparstarf ABC barnahjálpar í Kenýa var til umfjöllunar. Fjárframlögin breyttu miklu fyrir samtökin og nú eiga 340 börn bjartari framtíð fyrir höndum í landinu. Þó er enn þörf á mikilli hjálp til að sinna þeim verkefnum sem eru á döfinni að sögn Guðrúnar Margrétar Pálsdóttur formanns ABC barnahjálpar.

Fjárhæðin sem safnaðist er ekki minni en í mörgum landssöfnunum sem haldnar hafa verið hér á landi. Til viðmiðunar söfnuðust 37 milljónir í landssöfnun Rauða krossins á síðasta ári. Það er því ljóst að umfjöllum Kompáss hafði mikil áhrif.

„Við sem vinnum að þessum þætti erum afar stolt af því að þátturinn skuli hafa vakið svona viðbrögð," sagði Ingi R. Ingason framleiðandi Kompás. Hann segir það vilja hópsins að búa til efni sem hreyfi við fólki hvort sem það sé innanlands sem utan.

„Við viljum vekja athygli á málum sem eiga það skilið."

Guðrún Margrét segir ekki alla fjárhæðina renna til Kenýa. Hluti fjárhæðarinnar sé bundinn í sérstökum verkefnum. Þannig sé fimmtán milljóna króna framlag Atorku Group sem dæmi bundið í verkefni í Burkina Faso. Fyrirtækið hafði áhuga á að leggja grunninn í nýju landi.

Átta milljónir eru eyrnamerktar byggingu skóla á landi sem samtökin keyptu fyrir utan Naíróbí. Fjögur hús eru leigð undir börnin 200 á vegum samtakanna auk þess sem Þórunn leigir sjálf hús fyrir sig og fjölskylduna og hefur tekið inn á sig fjögur börn.

„Samt vantar dýnur og ýmislegt fleira, og við berjumst í bökkum alla daga til að ná endum saman," sagði Guðrún.

ABC barnahjálp styður tæplega 8.700 börn í Indlandi, Pakistan, Filippseyjum, Úganda, Kenýa og Líberíu. Börnunum hefur fjölgað um 2.200 á þessu ári. Samtökin eru einnig að hefja verkefni í þremur löndum til viðbótar, en þau eru Senegal Benin og Gínea-Bissau.

Eins og fyrr segir er enn þörf á stuðningsaðilum fyrir mörg börn á vegum samtakanna. Hér má nálgast heimasíðu ABC barnahjálpar þar sem hægt er að velja barn til að styðja.