Margra mánaða bið eftir aðgerð

Pör sem þurfa á tæknifrjóvgunaraðgerðum að halda verða að sætta sig við að bíða fram í apríl á næsta ári, nema þau hafi tök á að greiða aðgerðina að fullu úr eigin vasa. Skýringin er sú að fjármagn til tæknifrjóvgunaraðgerða er uppurið. Par hafði samband við fréttastofu Stöðvar 2 í morgun og sagði farir sínar ekki sléttar. Því var tilkynnt fyrir skömmu að ekki væri lengur til fjármagn til framkvæmdar tæknifrjóvgunar en þau áttu að fara í sína sjöttu meðferð nú um mánaðamótin ágúst-september. Vegna skorts á fjármagni þurfa þau hins vegar að bíða fram í apríl eftir að komast að eða greiða að fullu fyrir aðgerðina úr eigin vasa. Árið 1991 tók tæknifrjóvgunardeild Landspítalans til starfa og sinnti tæknifrjóvgunum þar til á síðasta ári en þá var deildin lögð niður. Landspítalinn gerði þá þjónustusamning við tæknifrjóvgunarstofuna Art Medica um framkvæmd tæknifrjóvgunaraðgerða en í samningnum var einungis kveðið á um 250 tæknifrjóvganir sem myndu dreifast yfir árið.  Barnleysi hrjáir um 15% para og er skilgreint sem sjúkdómur. Kristinn Jón Eysteinsson er formaður Tilveru - samtaka fólks gegn ófrjósemi - en þar eru skráðir 200 félagsmenn.   Hann segir að staða fólks á biðlista eftir tæknifrjóvgunaraðgerð sé afar slæm. Samtökin hafa fengið þau svör að Art Medica hafi reynt að fá heilbrigðsiyfirvöld til að koma til móts við sig hvað varðar meðferðir út árið en talað fyrir daufum eyrum. Fólk þurfi því að greiða meðferðirnar fullu verði. Aðspurður segir Kristinn að vitanlega hefði þjónustusamningurinn þurft að hljóða upp á fleiri meðferðir. Að sögn Jóns Kristjánssonar heilbrigðisráðherra vinna bæði forsvarsmenn Landspítalans og Art Medica að lausn málsins. Vonast ráðherra eftir tillögum þess efnis á næstu vikum.