Hátíð húðflúrara hefst í dag

„Það er alltaf stór hópur sem kemur hingað til lands og kíkir á hátíðina. Nú hefur ferðamönnum líka fjölgað gríðarlega og það nægir ekki bara að sýna þeim Hallgrímskirkju,“ segir Össur Hafþórsson, eigandi Bars 11 og einn af skipuleggjendum The Icelandic Tattoo Convention sem hefst í dag og stendur alla helgina.

Hátíðin fer fram í portinu á Bar 11 en þetta er í níunda skipti sem hún er haldin og hefur hún fest sig í sessi sem árlegur menningarviðburður í miðborg Reykjavíkur.

Össur segir að von sé á um tuttugu flúrurum frá öllum heimshornum en eins verður þétt tónlistardagskrá alla helgina. Helgarpassi á hátíðina kostar 1.500 krónur en dagspassinn 700 kr. og er frítt inn fyrir börn. „Hátíðin hefst kl. 14 í dag og mælum við með því að fólk mæti snemma til að bóka tíma og hitta listamennina."