Sérfræðingum ýtt til hliðar

Ítarlegar leiðbeiningar, sem samdar voru af helstu farsóttarsérfræðingum Bandaríkjanna og áttu að hjálpa ríkis- og borgarstjórum, eigendum verslana, trúarleiðtogum og öðrum að draga úr félagsforðun í skrefum, verða ekki birtar. Þessi ákvörðun var tekin innan ríkisstjórnar Donald Trump, forseta Bandaríkjanna. Upprunalega átti að birta leiðbeiningarnar frá Sóttvörnum Bandaríkjanna, CDC, í síðustu viku.

Í frétt AP fréttaveitunnar segir að ríkisstjórn Donald Trump hafi haft stjórn á öllu útgefnu efni varðandi félagsforðun og heimsfaraldur nýju kórónuveirunnar. Við hefðbundnar aðstæður væri það CDC sem héldi utan um viðmið varðandi félagsforðun og veitti almenningi og embættismönnum upplýsingar.

Stofnunin hefur hins vegar ekki haldið blaðamannafund í nærri því tvo mánuði.

Það þykir til marks um þá viðleitni Trump að setja aðgerðir vegna faraldursins, og ábyrgðina, á herðar einstakra ríkja. Kayleigh McEnany, nýr upplýsingafulltrúi Trump, ítrekaði það í gær. Á blaðamannafundi sagði hún alríkisstjórnina í ráðgjafahlutverki varðandi faraldurinn.

Þetta er langt frá því að vera eina dæmið um að sérfræðingum sé ýtt til hliðar vestanhafs. Slíkt er til marks um vilja ráðamanna til að draga hratt úr félagsforðun og koma hagkerfi Bandaríkjanna á ferð aftur. Sérfræðingar hafa varað við því að aflétta takmörkunum á ferðafrelsi fólks of fljótt og segja faraldurinn geta náð nýjum hæðum.

Doug Ducey, ríkisstjóri Arizon, tilkynnti fyrr í vikunni að hann ætlaði að flýta opnun fyrirtækja og sagði ríkið á réttri leið. Skömmu seinna lagði ríkið niður nefnd sérfræðinga sem hafði spáð því að virkum smitum myndi ekki fækka á næstu vikum, heldur fjölga. Nefnd þessi var skipuð sérfræðingum í farsóttum og voru þeir í sjálfboðavinnu.

Í svari við fyrirspurnum Washington Post sögðu embættismenn í Arizona að í stað þess að fara eftir líkönum sérfræðinganefndarinnar myndu þeir fylgja upplýsingum og líkönum frá alríkisstjórninni. Þau líkön eru ekki birt opinberlega.

Kannanir hafa sýnt fram á að almenningur í Bandaríkjunum vill frekari aðgerðir til að sporna gegn útbreiðslu kórónuveirunnar þar í landi. Fregnir hafa þó borist úr röðum Trump-liða að forsetinn og bandamenn hans telji að ástand efnahags Bandaríkjanna verði lykilmál í kosningabaráttunni í haust.

Fyrr í vikunni var líka opinberað að starfsnefnd Hvíta hússins vegna veirunnar yrði lögð niður en sú ákvörðun var fljótt gagnrýnd víða. Trump sneri þá ákvörðun sinni við og sagði það hafa komið sér á óvart hve mikið fólk hefði verið á móti því að nefndin yrði lögð niður.

Þrátt fyrir það sagði McEnany í gær að störfum nefndarinnar væri að mestu lokið.

Lítið hefur þó dregið úr útbreiðslu kórónuveirunnar í Bandaríkjunum og hafa minnst 73.431 dáið vegna veirunnar.

Þegar Trump var í gær spurður að því hvort dauðsföll myndu fjölga vegna tilslakana á félagsforðun sagðist hann vonast til þess að svo yrði ekki.

„Það getur þó vel verið,“ bætti hann við.