Eiður Smári sendi Lampard kveðju

Eiður Smári Guðjohnsen er ánægður með nýja knattspyrnustjórann hjá Chelsea ef marka má færslu hans á samfélagsmiðlum.

Frank Lampard var í gær ráðinn knattspyrnustjóri Chelsea og skrifaði þessi goðsögn hjá Chelsea þá undir þriggja ára samning.

Lampard hefur ekki mikla reynslu af þjálfun en hann er fjórði leikjahæsti leikmaður Chelsea frá upphafi og enginn hefur skorað fleiri mörk fyrir Chelsea en Lampard. Fári þekkja því Stamford Bridge betur en hinn 41 árs gamli Frank Lampard.

Eiður Smári og Frank Lampard eru góðir vinir frá þeim tíma þegar þeir spiluðu saman hjá Chelsea. Eiður Smári sendi vini sínum þessa kveðju hér fyrir neðan en hún kom inn á Instagram síðu Eiðs Smára.

 

 

 

View this post on Instagram

It’s time to enjoy your time on the sidelines @franklampard So excited for you and all @chelseafc fans

A post shared by Eidur Gudjohnsen (@eidurgudjohnsen) on Jul 4, 2019 at 2:08pm PDT

„Núna er tíminn til að njóta þess að vera á hliðarlínunni. Mjög spenntur fyrir þína hönd sem og allra stuðningsmanna Chelsea,“ skrifaði Eiður Smári og birti gamla mynd af sér og Lampard þegar þeir voru báðir á varamannabekk Chelsea-liðsins.

Eiður Smári var keyptur til Chelsea sumarið 2000 eða ári fyrr en Lampard. Þeir léku síðan saman hjá Chelsea frá 2001 til 2006. Ofan á það að vera liðsfélagar þá eru þeir einnig jafnaldrar, báðir fæddir árið 1978.

Eiður Smári og Frank Lampard upplifðu það líka saman þegar Chelsea breyttist úr meðalliði í ensku úrvalsdeildinni í besta lið deildarinnar.

Innkoma rússneska eigandans Roman Abramovich breytti öllu fyrir félagið og bæði Lampard og Eiður Smári voru allt í öllu tímabilið 2004-05 og 2005-06 þegar Chelsea vann fyrstu Englandsmeistaratitlana sína frá 1955.