Mpabbé grínaðist í Pelé: Erfitt að ná þúsund mörkum jafnvel þótt ég telji PlayStation-mörkin með

Einu unglingarnir sem hafa skorað í úrslitaleik HM í fótbolta hittust í gær og fór vel á með þeim.

Pelé og Kylian Mbappé skutust báðir upp á stjörnuhimininn á unglingsaldri. Pelé var aðeins 17 ára þegar hann lék með brasilíska landsliðinu á HM í Svíþjóð 1958. Hann skoraði sex mörk í keppninni, þar af tvö í úrslitaleiknum þar sem Brasilía vann Svíþjóð, 5-2.

Sextíu ár liðu þar til annar unglingur lék sama leik og Pelé. Mbappé, þá 19 ára, skoraði eitt marka Frakka í 4-2 sigri á Króötum í úrslitaleik HM í Rússlandi í fyrra. Hann skoraði alls fjögur mörk í keppninni og var valinn besti ungi leikmaður hennar.

Þessir frábæru fótboltamenn sátu fyrir svörum á blaðamannafundi í París í gær sem svissneski úraframleiðandinn Hublot stóð fyrir.

Mbappé fór ekki leynt með aðdáun sína á Brassanum og sagðist þurfa að snerta hann til að ganga úr skugga um að þetta væri Pelé sjálfur.

„Hann er algjör goðsögn,“ sagði Mbappé um Pelé. „Það var sérstakt að sjá hann í sjónvarpi en nú er ég búinn að hitta hann og get ekki lýst því hversu stoltur ég er.“

Virðingin var greinilega gagnkvæm og Pelé hrósaði franska ungstirninu, sem leikur með Paris Saint-Germain, í hástert. „Kylian er klár, fljótur og óútreiknanlegur. Hans helsti styrkleiki er að hann getur alltaf breytt leiknum. Það er fullt af leikmönnum sem búa yfir góðri tækni en eru ekki nógu óútreiknanlegir.“

Pelé vann heimsmeistaratitilinn tvisvar til viðbótar og skoraði meira en 1000 mörk áður hann lagði skóna á hillun. Mbappé vill vinna fleiri titla en segir langsótt að hann nái fjögurra stafa tölu í markaskorun.

„Það er mögulegt, ef þú telur öll mörkin sem ég hef skorað í PlayStation,“ sagði Mbappé léttur. „En jafnvel þótt ég taki með mörkin sem ég skora á æfingum verður erfitt að ná þessu.“

We're not sure who was more starstruck

Imagine Pele and Kylian Mbappe in the same teampic.twitter.com/PV2RU0CyDg

— Goal (@goal) April 3, 2019