Engin tilboð frá Englandi borist til Benitez

Engin tilboð hafa borist Rafa Benitez frá enskum úrvalsdeildarliðum en þrátt fyrir það eru enskir fjölmiðlar sannfærðir um að þessi 59 ára gamli Spánverji muni snúa aftur í ensku úrvalsdeildina áður en langt um líður.

Benitez yfirgaf Newcastle United síðastliðið vor og hefur stýrt Dalian Yifang í kínversku úrvalsdeildinni síðan en tímabilinu í Kína lýkur um næstu helgi og er lið hans í 10.sæti þrátt fyrir að vera með leikmenn á borð við Yannick Carrasco, Marek Hamsik og Salomon Rondon innanborðs.

Benitez á tvö ár eftir af samningi sínum við kínverska liðið en það sem þykir renna stoðum undir að hann bíði spenntur eftir starfi á Englandi er sú staðreynd að fjölskylda hans er enn búsett í Englandi.

Forráðamenn West Ham eru sagðir renna hýru auga til Benitez en Manuel Pellegrini gæti verið á útleið þaðan. Sömuleiðis eru forráðamenn Everton sagðir vera í leit að nýjum manni til að taka við af Marco Silva.