Fótbolti

Kolbeinn hefur aldrei spilað á sínum gamla heimavelli

Óskar Ófeigur Jónsson í Antalya skrifar
Kolbeinn Sigþórsson á æfingu íslenska landsliðsins í Antalya.
Kolbeinn Sigþórsson á æfingu íslenska landsliðsins í Antalya. Vísir/Sigurður Már

Sá sem ætti að þekkja heimavöll Galatasaray best af leikmönnum íslenska landsliðsins er að fara spila sinn fyrsta leik á Türk Telekom leikvanginum á fimmtudagskvöldið.

Kolbeinn Sigþórsson er að fara að mæta á sinn gamla heimavöll á fimmtudagskvöldið þegar Tyrkir taka á móti íslenska landsliðinu en íslenski landsliðsmaðurinn er engu að síður að fara að spila sinn fyrsta leik á vellinum.

„Þetta er erfiðasti útivöllur í Evrópu ef ekki í öllum heiminum. Það verður allt vitlaust á vellinum. Þetta verður erfiður leikur en við erum búnir að gera góða hluti hérna áður og förum með sjálfstraust inn í leikinn,“ sagði Kolbeinn.

Kolbeinn var á láni hjá Galatasaray í hálft ár frá ágúst til desember 2016. Leikurinn mikilvægi á móti Tyrkjum fer einmitt fram á heimavelli Galatasaray liðsins.  

„Ég hef reyndar aldrei náð því að spila á vellinum. Ég skrifaði undir hjá Galatasaray fyrir þremur árum en náði aldrei að spila. Núna fær ég að upplifa stemmninguna,“ sagði Kolbeinn sem meiddist fyrir sinn fyrsta leik og náði sér ekki af meiðslunum fyrr en tveimur árum síðar.

Kolbeinn spilaði ekkert með íslenska landsliðinu í tvö ár en er nú kominn aftur á skrið og tókst að jafna markamet Eiðs Smára Guðjohnsen í síðasta leik.

Kolbeinn lék með sænska liðinu AIK í sumar og skoraði 3 mörk í 17 leikjum í sænsku deildinni. Hann hefur einnig skorað þrjú mörk fyrir Ísland í þessari undankeppni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.