Enski boltinn

Mane búinn að búa til næstum því tvöfalt fleiri færi fyrir Salah en Salah fyrir Mane

Óskar Ófeigur Jónsson skrifar
Mohamed Salah og Sadio Mane.
Mohamed Salah og Sadio Mane. Getty/Gonzalo Arroyo

Liverpool er með fullt hús á toppi ensku úrvalsdeildarinnar en stærsti hluti umræðunnar er þó ekki um fjórar sigra í fjórum leikjum heldur deilurnar á milli framherjann frábæru Mohamed Salah og Sadio Mane.

Mohamed Salah og Sadio Mane skoruðu jafnmörg mörk í ensku úrvalsdeildinni í fyrra og enginn leikmaður í deildinni skoraði fleiri mörk. Nú er það öllum ljóst að það er mikil innbyrðis barátta hjá þeim um að skora fleiri mörk.

Það fór ekkert á milli mála eftir viðbrögð Sadio Mane og reiðikast hans eftir að hann var tekinn af velli í sigurleiknum á Burnley um helgina. Í fyrstu leit út fyrir að hann hafi verið hrikalega ósáttur með skiptinguna en fljótlega kom í ljós að reiði hans beindist að eigingirni Egyptans Mohamed Salah.

Skömmu fyrir skiptinguna hafði Mohamed Salah reynt að fara sjálfur þegar hann átti möguleika á að gefa boltann á Sadio Mane sem var í algjöru dauðafæri. Sadio Mane hafði skorað áður í leiknum en Salah ekki.

Farið var yfir samvinnu þeirra Mohamed Salah og Sadio Mane í þættinum Match of the Day 2 í breska ríkisútvarpinu og þar á meðal yfir það hvað þeir hafa verið að búa til af mörkum og færum fyrir hvorn annan.

Þar blasir við mikill munur á því hvor sé að búa til fleiri færi fyrir félagann og „keppinaut“ um mörkin hjá Liverpool.

Sadio Mane er nefnilega búinn að búa til næstum því tvöfalt fleiri færi fyrir Salah en Salah fyrir Mane eins og sést hér fyrir neðan.

Skjámynd/BBC

Frá því í ágúst 2017 hefur Sadio Mane búið til 43 færi fyrir Mohamed Salah í ensku úrvalsdeildinni og alls gefið 7 stoðsendingar. Mohamed Salah hefur á móti „aðeins“ búið til 25 færi fyrir Mane eða 18 færum færra. Stoðsendingarnar eru fjórar.

Ian Wright og Jermaine Jenas ræddu þessa tölfræði í þættinum og voru sammála um það að Mohamed Salah þurfi að fara launa Sadio Mane greiðann.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.