Innlent

Skilgreina Keflavík sem útstöð skæðustu sprengjuþotu heims

Kristján Már Unnarsson skrifar
Torséða B-2 þotan lenti á Keflavíkurflugvelli á fimmtudag. Ekki er vitað hvort kjarnorkusprengjur voru um borð en flugvélin getur borið allt að sextán slíkar. Það er stefna Bandaríkjahers að játa hvorki né neita spurningum um staðsetningu kjarnorkuvopna.
Torséða B-2 þotan lenti á Keflavíkurflugvelli á fimmtudag. Ekki er vitað hvort kjarnorkusprengjur voru um borð en flugvélin getur borið allt að sextán slíkar. Það er stefna Bandaríkjahers að játa hvorki né neita spurningum um staðsetningu kjarnorkuvopna. Mynd/U.S. Air Force.

Bandaríkjaher lítur á Ísland sem útstöð fyrir torséðu B-2 sprengjuþotuna, sem hönnuð er til kjarnorkuárása. Þetta má sjá í fréttatilkynningu flughersins vegna komu þotunnar til Keflavíkurflugvallar fyrir helgi en þar var meðal annars æfð eldsneytistaka með hreyfla þotunnar í gangi. Fjallað var um málið í fréttum Stöðvar 2

Sprengjuþotan B-2 Spirit lenti óvænt á Keflavíkurflugvelli síðastliðinn fimmtudag en þetta var í fyrsta sinn sem slík vél kom til Íslands. Þær eru raunar afar fágætar, aðeins 21 eintak hefur verið smíðað, enda er þetta dýrasta flugvél sögunnar, hver þota kostar yfir 90 milljarða króna. Heildarkostnaður við smíði og þróun hennar reyndist þó margfalt meiri eða um 260 milljarðar króna á hvert eintak.

Æfð var eldsneytisfylling á B-2 þotuna í Keflavík með hreyflana í gangi. Þessi ber heitið Spirit of Mississippi. Mynd/U.S. Air Force.

B-2 er engin venjuleg sprengjuþota og þegar Bandaríkjamenn vilja virkilega sýna hernaðarmátt sinn þá senda þeir þessa á vettvang enda er hún eitthvert skæðasta vopn sem til er. Hún getur borið allt að sextán kjarnorkusprengjur og var hönnuð á tímum kalda stríðsins til að geta komist óséð með farm sinn inn í mið Sovétríkin. Til þessa hefur hún þó eingöngu notað hefðbundnar sprengjur í átökum, fyrst í Kosovo og síðar í Afganistan, Írak og Líbýu. 

Í Keflavík vakti athygli að áhöfn vélarinnar og hermenn á jörðu æfðu sig í hraðri eldsneytisáfyllingu með því að setja á hana eldsneyti án þess að slökkt væri á hreyflunum, rétt eins og hún væri á leið í árásarferð.

B-2 er dýrasta flugvél sögunnar en þróun og smíði hennar kostaði 260 milljarða króna á hvert eintak. Rekstur hverrar þotu kostar 17 milljónir króna á klukkustund. Mynd/U.S. Air Force.

Í fréttatilkynningu bandaríska flughersins kemur fram að þessi æfing hjálpi til við að nota Keflavíkurherstöðina sem útstöð fyrir B-2 og tryggja þannig að sprengjuþotan sé til reiðu sem trúverðugt afl til að verja Bandaríkin og bandamenn þeirra í sífellt flóknara öryggisumhverfi.

Vélin kom hingað frá herflugvelli í Englandi og miðað við umræðuna þar má leiða líkur að því að flug hennar til Íslands sé engin tilviljun, á sama tíma og varaforseti Bandaríkjanna, Mike Pence, er á leið til landsins að ræða við íslenska ráðamenn um ógnina sem stafar af Rússlandi og Kína á norðurslóðum.

Þrjár bandarískar B-2 sprengjuþotur verða staðsettar á Fairford-herflugvellinum í Suður-Englandi næstu tvo mánuði Mynd/U.S. Air Force.

Þotan er ein þriggja slíkra sem staðsettar eru tímabundið í Bretlandi í tvo mánuði. Í viðtali við ITV-sjónvarpsstöðina sagði Kurt Wendt, ofursti í bandaríska flughernum, að koma vélanna þangað sendi afar sterk og sýnileg skilaboð um að Bandaríkin og bandamenn þeirra í NATO geti beitt hernaðarmætti sínum hvar sem er og hvenær sem er. 

Hér má sjá myndir frá komu vélarinnar til Keflavíkurflugvallar:


Tengdar fréttir

Katrín og Pence funda á Keflavíkurflugvelli

Fundurinn verður haldinn í húsi Landhelgisgæslunnar á Keflavíkurflugvelli að kvöldi 4. september þegar forsætisráðherra kemur til landsins af fundum í Svíþjóð og Danmörku.

Trump-fundur beinir kastljósi umheimsins að norðurslóðum

Væntanlegur fundur Donalds Trumps Bandaríkjaforseta með leiðtogum Grænlands og Færeyja sýnir aukinn áhuga stórveldanna á Norðurskautinu og Norður-Atlantshafi, að mati Guðlaugs Þórs Þórðarsonar utanríkisráðherra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.