„Við erum löngu orðin of sein að bregðast við“
Hópur fólks minntist þess í dag að jökullinn Ok hefði misst sinn sess og teldist ekki lengur vera einn af jöklum Íslands. Forsætisráðherra segir aðgerðir í loftslagsmálum skipta meira máli en yfirlýsingar um neyðarástand. Jöklasérfræðingur segir þegar ljóst að loftslagsbreytingar hafi í för með sér alvarlegar afleiðingar fyrir allt mannkyn.
Hópur vísinda- og listamanna með Katrínu Jakobsdóttur, forsætisráðherra og Mary Robinsson, fyrrverandi forseta Írlands í broddi fylkingar fór að rótum hins fyrrverandi jökuls í Kaldadal í morgun þar sem hann var formlega kvaddur og við það tækifæri afhjúpaður minnisvarði um jökul sem áður var. Með hvarfi Oks jökuls, sem áður taldi um 15 ferkílómetra og var um 50 metra þykkur, er komið nýtt vatn sem er hæsta stöðuvatn landsins og hefur hlotið nafnið Blávatn.
Sjá einnig: „Í dag kveðjum við formlega jökulinn Ok“
56 smájöklar á norðurhluta Íslands hafa horfið en þeir voru alls 300 talsins árið 2014. Það að Ok jökull sé horfinn er skýr birtingarmynd hnattrænnar hlýnunar. „Við erum löngu orðin of sein að bregðast við henni því að það munu koma alvarlegar afleiðingar af því fyrir allt mannkyn sem að við getum ekki stoppað. En við verðum að bregðast eins hratt við og við getum til þess að minnka þessi áhrif,“ segir Oddur Sigurðsson jöklasérfræðingur sem las upp dánarvottorð Ok jökuls við athöfnina í dag en það var hann sem úrskurðaði Ok ekki lengur jökul árið 2014.
„Við þurfum auðvitað að bæði standa okkar vakt, en við þurfum líka að taka þessi mál upp á alþjóðavettvangi í miklu ríkari mæli en við höfum gert,“ segir Katrín Jakobsdóttir forsætisráðherra.
En telur hún ástæðu fyrir Íslendinga til að lýsa yfir neyðarástandi vegna loftslagsmála?
„Mín skoðun er sú að í þessu máli skipti aðgerðir meiru en orð,“ svarar Katrín. „Við erum að sjá neyðarástand víða um heim vegna loftslagsbreytinga. Stóra málið er, hvað ætlum við að gera til að bregðast við því?“
Guðmundur Ingi Guðbrandsson umhverfisráðherra tekur í sama streng. „Það er líka mikilvægt, að land eins og Ísland sem að hefur þessa fallegu táknrænu jökla, sendi út skýr skilaboð um það, eiginlega bara „hingað og ekki lengra,“ nú er þörf á að allir taki höndum saman, Ísland, Norðurlöndin, og öll önnur ríki,“ segir Guðmundur Ingi.
Tengdar fréttir
„Í dag kveðjum við formlega jökulinn Ok"
"Minningarathöfn fór fram við fyrrverandi jökulinn Ok í dag. Ok varð árið 2014 fyrsti jökullinn til að missa titil sinn sem slíkur en vísindamenn telja ljóst að sömu örlög blasi að óbreyttu við jöklum heims vegna loftslagsbreytinga.
Óttast að minnisvarðinn um Ok verði ekki sá síðasti
Vísindamenn sem áttu hugmyndina að því að setja minnismerki við dauða jökulinn Ok óttast að þótt minnisvarðinn sé fyrsti sinnar tegundar í heiminum verði hann ekki sá síðasti.
Enginn her dugar gegn loftslagsbreytingum
Þegar Andri Snær Magnason rithöfundur var beðinn um að skrifa texta á minnismerki um Ok, jökulinn sem hvarf, hélt hann sig vera að skrifa fyrir örfáa einstaklinga. Nú er þetta líklega orðið hans mest lesni texti frá upphafi.
Gæti orðið sögulegur leiðtogafundur á Íslandi
Andri Snær Magnason telur að fundur Angelu Merkel Þýskalandskanslara með íslenskum og norrænum ráðamönnum í næstu viku geta orðið sögulegan með tilliti til umhverfismála.
Nasa birtir myndir af hverfandi ísbreiðu Oks
Nasa Earth birti í gær myndband á Twitter þar sem sýndur er munurinn á ísbreiðu Okjökuls á milli áranna 1986 og 2019 og eru breytingarnar gríðarlegar.
