Tónlist

Lag sem allir geta tengt við

Steingerður Sonja Þórisdóttir skrifar
Logi Pedro segir það enn óráðið hvað hann geri um verslunarmannahelgina.
Logi Pedro segir það enn óráðið hvað hann geri um verslunarmannahelgina.

Í gær kom út lagið Svarta ekkja með Loga Pedro. Það er fyrsta lagið sem kemur út af næstu plötu Loga, sem enn hefur ekki hlotið nafn.

„Það er algjört leyndó hvað næsta plata á að heita, það er mjög mikið leyndó,“ segir Logi kíminn. ,,Nei, nei ég er bara að grínast, það er ekki enn komið nafn á hana.“

Logi syngur einn í laginu en hann samdi það með Arnari Inga Ingasyni, einnig þekktur sem Young Nazareth. Arnar pródúseraði meðal annars lögin Joey Cypher með Joey Christ og Time með Sturlu Atlas. En aftur að Svörtu ekkjunni.

„Lagið hefur verið til í marga mánuði en við ákváðum að bíða með það. Lagið var frumflutt á Airwaves í fyrra. Við ákváðum samt að gefa það ekki út alveg strax og reyna að fá góða mynd á þetta, vildum gott rými og góðan tíma til að gefa lagið út.“

Hann segir texta lagsins hafa komið til þeirra og hann fjalli ekki um einn né neinn beint.

„Þetta er samt ekki eitthvert hugsjónalaust popplag þannig séð. Ég held að flestir geti á einhverjum tímapunkti svona samsamað sig því sem kemur fram í laginu.“

Logi segir það hafa spilað inn í tímasetningu útgáfu lagsins að svona poppað og grípandi lag sé gaman að gefa út yfir hásumarið. Í raun eru góðar líkur á að hér sé mættur smellur sumarsins. En Logi er ekki bara að gefa út tónlist heldur hefur hann nógu í að snúast með Útvarp 101 og 101 Product­ions.

„Það var líka bara erfitt að finna almennilegan tíma til að gefa lagið út þar sem það er búið að vera svo mikið að gera með útvarpið og framleiðslufyrirtækið. Við erum alveg að drukkna í vinnu.“

Í augnablikinu sér Logi Pedro um morgunþáttinn Múslí með Sigurbjarti Atlasyni á Útvarp 101.

„Svo erum við líka að framleiða efni fyrir Stöð 2. Núna erum við til að mynda að framleiða þáttinn Gym sem er í umsjón Birnu Maríu Másdóttur. Þetta er lífsstíls- og viðtalsþáttur, hún fær til sín góða gesti. Mjög skemmtilegir þættir sem eru búnir að vera á Stöð 2 í sumar,“ segir Logi.

Hann segir dagskrána hjá sér um verslunarmannahelgina vera óráðna og hann nokkuð laus enn sem komið er, en hann muni finna sér eitthvað að gera, hvort sem það sé að spila eða annað.

Lagið Svarta ekkja er hægt að nálgast á öllum helstu streymisveitum.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.