Fylkir og Selfoss gerðu 1-1 jafntefli í Pepsi Max deild kvenna í kvöld.



Hólmfríður Magnúsdóttir hélt áfram að gera gott mót með Selfyssingum og skoraði fyrsta mark leiksins eftir 23 mínútur.



Undir lok fyrri hálfleiks á Würth-vellinum í Árbænum slapp Ída Marín Hermannsdóttir í gegn um vörn Selfyssinga en lenti í smá brasi við að taka boltann með sér í teignum og virtist hreinlega detta um Kelsey Wys í marki Selfoss.



Þórður Már Gylfason dæmdi vítaspyrnu, Ída Marín fór á punktinn og skoraði af öryggi.



Fleiri urðu mörkin ekki og niðurstaðan jafntefli.



Mörkin úr leiknum má sjá hér að neðan, en það verður farið vel yfir þau, sem og önnur úr leikjum umferðarinnar í Pepsi Max-Mörkum kvenna annað kvöld klukkan 21:15 á Stöð 2 Sport.