Innlent

Forstjóri Icelandair segir Airbus bjóða besta arftaka Boeing 757

Kristján Már Unnarsson skrifar
Airbus A321neo í flugtaki. Þetta er þotan sem forstjóri Icelandair segir henta félaginu best til að leysa Boeing 757 af hólmi.
Airbus A321neo í flugtaki. Þetta er þotan sem forstjóri Icelandair segir henta félaginu best til að leysa Boeing 757 af hólmi. Mynd/Airbus.
Ráðamenn Icelandair skoða nú þann möguleika að taka Airbus-vélar inn í flugflotann og skipta jafnvel öllum Boeing-vélunum út fyrir Airbus. Stefnt er að ákvörðun á síðari hluta ársins. Fjallað var um málið í fréttum Stöðvar 2.

Allt frá því Flugfélag Íslands fékk fyrstu þotuna til landsins árið 1967, Boeing 727-þotuna Gullfaxa, hafa Icelandair og forverar þess aldrei keypt nýjar þotur frá öðrum framleiðanda en Boeing. En núna kann að verða breyting þar á.

Boeing 757 hefur verið burðarklár Icelandair í hartnær 30 ár og er án vafa sá farkostur í sögunni sem flutt hefur flesta Íslendinga til útlanda og heim aftur. Boeing hætti framleiðslu hennar fyrir 15 árum.Stöð 2/Sigurjón Ólason.
Icelandair er núna með þrjár tegundir Boeing-véla í millilandafluginu; 757, 767 og 737 MAX, en MAX-vélarnar voru kyrrsettar fyrir tveimur mánuðum. 

Á fundi með fjárfestum á Loftleiðahótelinu í morgun skýrði forstjórinn frá því að verið væri að móta nýja flotastefnu og að þrír kostir kæmu til greina.

Bogi Nils Bogason, forstjóri Icelandair.Stöð 2/Sigurjón Ólason.
„Möguleikarnir sem við erum að horfa á eru í raun bara: Óbreytt stefna; að MAX-vélarnar, 757 og 767 verði svona grunnvélarnar okkar til 2025, í það minnsta. 

Kostur númer tvö, það er í rauninni að fara fyrr út úr 757-vélunum, nota MAX-vélarnar áfram en taka Airbus A321 neo með þá MAX-vélunum. 

Þriðji kosturinn er að fara bara algerlega yfir í Airbus,“ segir Bogi Nils Bogason, forstjóri Icelandair.

Boeing 767 breiðþotur eru stærstu þotur Icelandair.Skjáskot/Youtube.
Athygli vekur að Icelandair tiltekur sérstaklega Airbus A321neo en þess má geta að WOW-air notaði slíkar vélar. Jómfrúarflug A321neo var í janúarlok 2018 og má sjá hér.

„Það er tegund sem hentar mjög vel okkar leiðarkerfi og er í rauninni, eins og staðan er núna, besta leiðin til að leysa 757 af hólmi, ef útreikningar okkar styðja þær upplýsingar sem við erum með núna,“ segir Bogi. 

Icelandair-menn hafa áður lýst áhuga á Boeing 797, sem flugvélaframleiðandinn er með á teikniborðinu, en Bogi segir hana ekki í myndinni núna, enda liggi ekki fyrir nægilegar upplýsingar um þá vél.

Fyrsta Boeing 737 MAX-þota Icelandair var sýnd almenningi á Reykjavíkurflugvelli í fyrra.Mynd/Stöð 2.
Það má spyrja hvort þetta útspil Icelandair sé liður í einskonar póker, nú þegar framundan eru viðræður um skaðabætur frá Boeing vegna MAX-vélanna. 

„Nei, við erum ekki í neinum póker. Við endurskoðum okkar flotastefnu reglulega og þetta er vinna sem við ákváðum að fara í löngu áður en málið með MAX-vélarnar kom upp. Þannig að þetta snýst alls ekki um að spila póker. Þetta snýst bara um að styrkja grundvöll okkar félags til framtíðar,“ svarar forstjóri Icelandair. 

Hér má sjá frétt Stöðvar 2:


Tengdar fréttir

Þotan sem Airbus býður sem arftaka Boeing 757

Þotan sem flutt hefur flesta Íslendinga til útlanda, Boeing 757, gæti loksins verið komin með arftaka. Það er nýjasta vél Airbus, sem fór í sitt fyrsta flug í gær.

Framtíð áratugalangs samstarfs Icelandair og Boeing ræðst í haust

Icelandair vinnur nú að því að endurskoða langtímaflugflotastefnu félagsins og til greina kemur að taka Airbus-vélar inn í flugflota félagsins. Forstjóri félagsins segir að engu að síður treysti Icelandair Boeing MAX-vélunum og lagði hann áherslu á áratuga samstarf Icelandair og Boeing á fjárfestakynningu fyrr í dag.

Óljóst hvernig Boeing hyggst bæta tjónið

Sérfræðingar telja líklegt að framleiðandinn þurfi að greiða mismuninn á rekstrarkostnaði vegna flugvéla og leigu á nýjum eftir kyrrsetningu 737 MAX 8.

Þrjár MAX-vélar Icelandair safna ryki við Boeing Field

Enn er alls óvíst hvenær MAX-flugvélar bandaríska flugframleiðands Boeing frá grænt ljós á að hefja sig til lofts á ný. Óafhentar vélar hrannast nú upp við verksmiðju Boeing í grennd við Seattle.




Fleiri fréttir

Sjá meira


×