Innlent

Norðausturhringurinn lagður bundnu slitlagi

Kristján Már Unnarsson skrifar
Elías Pétursson, sveitarstjóri Langanesbyggðar, bendir á svæðið þar sem síðustu malarkaflarnir eru á þjóðveginum um norðausturhorn landsins.
Elías Pétursson, sveitarstjóri Langanesbyggðar, bendir á svæðið þar sem síðustu malarkaflarnir eru á þjóðveginum um norðausturhorn landsins. Stöð 2/Friðrik Þór Halldórsson.
Átak hefst í sumar við að byggja upp þjóðveginn um Langanesbyggð, milli Þórshafnar og Bakkafjarðar. Sveitarstjórinn segir þetta mjög ánægjulegar vegarbætur en með þeim verður norðausturhringurinn allur lagður bundnu slitlagi. Þetta kom fram í fréttum Stöðvar 2. 

Þegar kort Vegagerðarinnar yfir bundið slitlag er skoðað sést að á 44 kílómetra þjóðvegi milli Þórshafnar og Bakkafjarðar eru ennþá 27 kílómetrar af malarvegi en þetta er síðustu ómalbikuðu kaflarnir á strandleiðinni um norðausturhorn landsins. Alþingi hefur nú með samþykkt samgönguáætlunar, að tillögu umhverfis- og samgöngunefndar, markað þá stefnu að strax í sumar verði hafist handa við að klára þetta verk. 

Elías Pétursson, sveitarstjóri Langanesbyggðar, segir mjög ánægjulegt að sjá hvað þingnefndin virðist taka skýra afstöðu hvað varðar veginn um Langanesströnd og í framhaldinu um veginn um Brekknaheiði. 

„Það er mjög ánægjulegt fyrir okkur eftir mjög langa baráttu við það að fá þessar vegarbætur,“ segir Elías. 

Þingnefndin tengir þetta við átak um eflingu byggðar við Bakkaflóa og leggur eindregið til að lagningu bundins slitlags á Langanesströnd ljúki eigi síðar en 2021. Í beinu framhaldi verður farið í veginn um Brekknaheiði og má gera ráð fyrir að honum ljúki innan sex ára.

Bændurnir á Miðfjarðarnesi við Bakkaflóa, Krzysztof Krawczyk og Sigríður Ósk Indriðadóttir.Stöð 2/Arnar Halldórsson.
Þetta mun breyta miklu fyrir bændurna á Miðfjarðarnesi, þau Sigríði Ósk Indriðadóttur og Krzysztof Krawczyk, sem við hittum síðastliðið sumar, en þau sækja bæði vinnu til Þórshafnar, auk þess sem börnin þeirra fara þangað í grunnskóla og það yfir heiði. 

„En það eru ekkert margir dagar sem ég kemst ekki í vinnu vegna veðurs. En vegurinn er náttúrlega alveg afleitur yfirleitt,“ segir Sigríður Ósk. 

Vegarbæturnar munu gera svokallaðan norðausturhring álitlegri fyrir ferðamenn. 

„Það er það sem við höfum haldið fram; að þetta hafi ekki bara áhrif á þetta sveitarfélag heldur líka á ferðaþjónustu á öllu svæðinu. 

Vegna þess að það virðist vera þannig að túrismi gengur svolítið út á það að keyra í hringi en ekki fram og til baka. Og vegurinn hefur verið mikill tálmi hvað það varðar að bæði túristar og rútufyrirtæki kæmu þessa leið,“ segir sveitarstjóri Langanesbyggðar. 

Hér má sjá frétt Stöðvar 2:

Langanesbyggð Norðurþing Samgöngur Vopnafjörður

Tengdar fréttir

Vopnfirðingar sjá fram á hátíð eftir 2 ár

Vopnfirðingar telja sig ljónheppna að nýr vegur til héraðsins skyldi hafa sloppið í útboð rétt fyrir hrun. Fyrir vikið sjá þeir fram á hátíðarhöld eftir tvö ár.

Kárahnjúkavinnubúðir verða hótel á Langanesi

Tafir á Helguvíkurframkvæmdum urðu til þess að vinnubúðir, sem áttu að fara þangað frá Kárahnjúkum, lentu í höndum hollenskrar konu, sem nú er að breyta þeim í íbúðahótel á Langanesi fyrir sextíu gesti.

Vopnfirðingar fá malbikið í sumar

Tímamót verða í samgöngumálum Vopnfirðinga í sumar þegar héraðið tengist öðrum landshlutum með bundnu slitlagi í fyrsta sinn. Lagning nýja vegarins í Vopnafjörð er langt komin en hún er stærsta verkefnið sem unnið er að í vegagerð hérlendis um þessar mundir.

Konurnar ætla að dansa vegna nýja vegarins

Íbúar á norðausturhorni landsins efna til allsherjar héraðshátíðar á sex stöðum um helgina í tilefni þess að nýr vegur yfir Melrakkasléttu verður formlega opnaður, en með honum styttast leiðir til bæði Raufarhafnar og Þórshafnar, auk þess sem samfellt malbik verður komið þangað alla leið úr Reykjavík.

Mest lesið


Fleiri fréttir

Sjá meira


×

Mest lesið