Hannes orðinn leikmaður Qarabag

Íslenski landsliðsmarkvörðurinn Hannes Þór Halldórsson er genginn til liðs við aserska liðið Qarabag. Umboðsmaður hans, Ólafur Garðarsson, staðfesti þetta við Fótbolta.net í kvöld.

Hannes gekkst undir læknisskoðun í Austurríki í dag þar sem liðið er í æfingaferð.

Qarabag vann deildina í Aserbaísjan á síðasta tímabili og komst í riðlakeppni Meistaradeildarinnar þar sem liðið mætti Roma, Chelsea og Atletico Madrid.

Hannes kemur til liðsins frá Randers í Danmörku þar sem hann hefur verið undanfarin tvö ár.

Qarabag mætir Olimpija frá Slóveníu í fyrstu umferð undankeppni Meistaradeildarinnar í næstu viku.