Loksins hipp og kúl að ganga á skíðum

Óskar Jakobsson gengur á skíðum og hleypur maraþon. Hann kennir byrjendum grunnatriði í skíðagöngu og segir íþróttina njóta sífellt meiri vinsælda.

Skíðakappinn, maraþonhlauparinn og prentarinn Óskar Jakobsson hefur lagt stund á íþróttir frá unga aldri. Hann fór fyrst á gönguskíði þegar hann var sex ára gamall og eftir það varð ekki aftur snúið. Fyrir rúmum áratug tók Óskar áskorun um að taka þátt í Vasagöngunni í Svíþjóð og hóf að hlaupa langar vegalengdir til að undirbúa sig sem best. Í dag hefur hann tekið þátt í 14 maraþonhlaupum og er hvergi nærri hættur.

Þótti ekki töff

„Ég kynntist skíðagöngu í gegnum æskuvin minn Sigurð Oddsson en faðir hans var mikill skíðagöngumaður. Svo fékk ég góðan þjálfara, Þröst Jóhannesson, og það varð ekki til að draga úr áhuganum. Um sjö ára aldurinn fór ég að keppa og tók þátt í flestum mótum á Ísafirði og auðvitað Andrésar Andar leikunum á Akureyri,“ segir Óskar Jakobsson um tildrög þess að hann batt á sig gönguskíðaskóna en hann er alinn upp í skíðaparadísinni Ísafirði.

„Á þessum árum voru flestir á svigskíðum og það þótti ekki töff að vera á gönguskíðum. Undanfarin átta ár eða svo hefur íþróttin sannarlega sótt í sig veðrið þannig að núna, eftir fjörutíu ár, er ég loksins orðinn hipp og kúl,“ segir Óskar hlæjandi.

Tilvalið fjölskyldusport

Skíðaganga hefur marga góða kosti og er tilvalið fjölskyldusport, að sögn Óskars. „Þetta er holl hreyfing sem reynir alhliða á líkamann, auk þess að auka þol, úthald og styrk. Skíðaganga er miklu skemmtilegri en fólk á von á. Margir halda að þetta sé erfið og leiðinleg íþrótt en komast síðan að því að svo er ekki. Mér finnst útiveran einn stærsti kosturinn og maður fær mikla útrás á skíðunum.“

Óskar stundar íþróttina af miklu kappi þótt hann sé hættur að keppa. Hann stendur fyrir námskeiðum fyrir byrjendur á gönguskíðum í samvinnu við Auði Ebenezersdóttur sem einnig er frá Ísafirði og margfaldur Íslandsmeistari í greininni. „Við tökum fagnandi á móti öllum sem vilja læra á gönguskíði. Kennslan fer fram í Bláföllum og þar eru margar afbragðsgönguleiðir. Í byrjun mars ætlum við að skipta um umhverfi, taka frí frá hversdags­amstrinu og halda til Tékklands þar sem við verðum með vikulangt skíðagöngunámskeið,“ upplýsir Óskar.

Maraþon í jakkafötum

Þrátt fyrir miklar annir gefur Óskar sér líka tíma fyrir langhlaup en hann hefur tekið þátt í 14 maraþonhlaupum víða um heim og þjálfað hlaupahóp Fjölnis. „Í fyrrasumar tók ég þátt í Reykjavíkurmaraþoni sem var eftirminnilegt. Pétur Ívarsson, verslunarstjóra í Boss og einn hlaupafélaga minn, langaði að hlaupa í þágu góðs málefnis og úr varð að við vorum nokkrir saman í hóp sem hlupum í Boss-jakkafötum og söfnuðum fyrir Einstök börn. Það var gaman að taka þátt og láta um leið gott af sér leiða,“ segir Óskar sem er þegar farinn að undarbúa sig fyrir næsta hlaup.

Senda má póst á skidagongunamskeid@gmail.com og fá nánari upplýsingar um skíðanámskeiðið. Einnig má hafa samband í gegnum Facebook: https://www.facebook.com/groups/1000704526658116/