Ari Freyr spilaði allan leikinn í tapi

Íslenski landsliðsmaðurinn Ari Freyr Skúlason lék allan leikinn í hjarta varnarinnar hjá Lokeren þegar liðið heimsótti Cercle Brugge í belgísku úrvalsdeildinni í dag.

Lokeren byrjaði leikinn skelfilega því heimamenn komust í 2-0 á fyrstu tíu mínútum leiksins. Ari Freyr og félagar náðu að vinna sig inn í leikinn og minnkuðu muninn strax á 20.mínútu með marki úr vítaspyrnu.

Jose Cevallos jafnaði svo í 2-2 eftir rúmlega klukkutíma leik og leit allt út fyrir að leikurinn myndi enda með jafntefli. Heimamönnum tókst hins vegar að ná inn sigurmarki í uppbótartíma og lokatölur því 3-2 fyrir Cercle Brugge.

Annað tap Lokeren í jafnmörgum leikjum en liðið steinlág á heimavelli fyrir Genk í fyrstu umferð 0-4.