Henderson og Keita enn úr leik hjá Liverpool

Jurgen Klopp segir Liverpool þurfa fullkomna frammistöðu til þess að vinna Arsenal í stórleik umferðarinnar í ensku úrvalsdeildinni um helgina.

Arsenal hefur unnið 11 af síðustu 12 leikjum sínum en Klopp hefur enn ekki tapað fyrir Arsenal síðan hann tók við Liverpool.

„Þeir skora helling af mörkum og eru mjög góðir sóknarlega. Við þurfum að sjá hvernig leikurinn þróast þar sem þetta eru tvö mjög sóknarsinnuð lið,“ sagði Klopp á blaðamannafundi í dag.

„Við þurfum að koma í veg fyrir að þeir skori en það verður erfitt því þeir eru með mörg mismunandi verkfæri til þess. Þeir eru með hraðann til þess að refsa öllum mistökum.“

Klopp staðfesti á fundinum að Jordan Henderson og Naby Keita geti ekki verið með vegna meiðsla. Mohamed Salah ætti þó að geta verið með þrátt fyrir að hafa skartað umbúðum um úlnlið á æfingum í vikunni.

„Það er ekkert alvarleg, hann var smá bólginn og þetta var bara varúðarráðstöfun.“