Ósætti innan liðs United vegna Matic

Leikmenn í liði Manchester United eru ekki sáttir við að Nemanja Matic eigi fast sæti í byrjunarliði liðsins. Þetta segir grein The Times í dag.

Serbinn hefur legið undir nokkurri gagnrýni á tímabilinu og lélegur varnarleikur hans leiddi til þess að Ilkay Gundogan skoraði þriðja markið í 3-1 sigri Manchester City í grannaslagnum um helgina.

Matic byrjaði vel með United þegar hann kom til liðsins fyrir síðasta tímabil en eftir áramót fór frammistaða hans niður á við. Þrátt fyrir það hélt hann alltaf sæti sínu og byrjaði 35 af 38 leikjum í deildinni síðasta vetur.

Á þessu tímabili hefur Matic byrjað alla leiki nema þegar hann var meiddur.

Traustið sem Matic fær frá Jose Mourinho kemur mörgum innan félagsins á óvart og sumum leikmönnum liðsins finnst miðjumaðurinn vera ósnertanlegur og eiga sæti sitt víst sama hversu vel eða illa hann spilar.