Leicester heiðraði minningu Srivaddhanaprabha með sigri

Demarai Gray skoraði sigurmark Leicester í fyrsta leiknum eftir andlát eigandans Vichai Srivaddhanaprabha í dag.

Það var mikið um tilfinningar þegar Leicester og Cardiff mættust á heimavelli Cardiff í dag. Stuðningsmenn beggja liða minntust Srivaddhanaprabha sem fórst í þyrluslysi um síðustu helgi.

Fyrirfram skiptu úrslit leiksins litlu þar sem tilefnið snérist um að heiðra minningu Srivaddhanaprabha, en leikmenn og stuðningsmenn Leicester fögnuðu 1-0 sigri í leikslok.

Eina markið kom á 55. mínútu. Ben Chilwell átti sendingu inn á teiginn þar em Gray var mættur og kláraði í netið. Hann fagnaði markinu með því að rífa sig úr treyjunni þar sem hann skartaði bol undir henni sem á stóð „fyrir Khun Vichai.“

Aron Einar Gunnarsson spilaði allan leikinn á miðjunni hjá Cardiff sem fer í fallsæti eftir úrslit dagsins.