Birkir fór meiddur af velli í fyrri hálfleik

Birkir Bjarnason fór meiddur af velli er Aston Villa tapaði 1-0 gegn QPR á útivelli í ensku B-deildinni í knattspyrnu í kvöld.

Birkir var í byrjunarliði Aston Villa en fór af velli á 41. mínútu eftir að hafa orðið fyrir höggi í fyrri hálfleik.

Eina mark leiksins kom þremur mínútum áður en Birkir fór af velli en þá skoraði Pólverjinn Pawel Wszolek eftir langa sendingu frá Geoff Cameron.

Það hefur ekki gengið sem skildi hjá Villa þetta tímabilið eftir að hafa farið í úrslitaleikinn í umspilinu á síðasta tímabili. Liðið er nú í 16. sæti deildarinnar.

QPR er á góðu skriði en þetta var þriðji sigur þeirra í röð. Þeir eru í sjöunda sæti deildarinnar með 23 stig, þremur stigum frá toppnum.